Auto Corner
by Ruata
Maruti Suzuki chu tunhnaiah lirthei thar, tuna an lirthei chhuak mek ho tuaithar leh next generation model te tichhuak turin an inbuatsaih mek a, reiloteah lirthei thar te pawh an nei turah ngai ila. An lirthei chhuak thar tur thenkhat te hian an 1.5 litre khawl thar tur K15C petrol khawl hi an rawn hmang dawn a ni.
Engin nge hmang dawn?
Maruti Suzuki lirthei thar tur zinga an 1.5 khawl thar K15C petrol khawl hmang tur hnaivai te chu tuna tihchhuah tura an buatsaih mek an MPV lirthei tha tak mai XL6 te, an compact SUV hralh kal tak Brezza new generation model bakah an sedan neihchhun Ciaz lo chhuak thar leh tur te a ni dawn a. Heng ho hian a hmain an 1.5 litre khawl tho an hmanga, a chi thar deuh K15C petrol khawl hi an rawn hmang dawn a ni.
Tunah hian he khawl thar hmang tur zinga mi, an MPV tha tak mai, NEXA atanga hralhchhuah XL6 hi an tichhuak tep tawh niin a lang a. Tunah hian an tihchhuah rualpui tur Ertiga nen a book theih tan tawh a, Rs. 11,000 chawiin a book theih tawh a ni. XL6 hian a hma aia alloy wheel lian hret, a lirthei ti mawi tak tur a rawn hmang tawh dawn a. Hei bakah hian thil changkang hrang hrang leh hmanraw hrang hrang a rawn neih dawn a, Baleno tharin a neih ang infotainment system thar tha tak leh a chhung pawh design thar mawi tak a rawn nih hmel a. Hei bakah hian a lirthei hian hmel thar mawi tak a rawn pu dawn a, sunroof te pawh a rawn neih tel hmel a ni.
XL6 hi an tihchhuah hnuah Maruti Suzuki chuan India mipuiin an nghahhlelh zinga mi tho Maruti Suzuki Brezza thar an rawn tihchhuah leh a rinawm a. Hetah pawh hian thil inthlak hrang hrang tha tak tak kan hmu dawn a ni. He compact SUV chhuak thar leh tunah hian a hmanraw neih tur hrang hrang zingah wireless charging system, 360 degree parking camera, sunroof, touchscreen infotainment system hlai tha tak, wireless smartphone connectivity awmtel bakah thil dang dang a awm tawh beisei a ni bawk. Hei bakah hian an midsize sedan tha tak mai Ciaz pawh hi lo la chhuak zui zel tur a ni a, heng lirthei te ho hian K15C petrol khawl thar tha tak hi an rawn hmang dawn a. He khawl hi lirthei dangah pawh kan la hmu zui zel thei awm e.
K15C petrol khawl thar chu?
Maruti Suzuki hian heng an lirthei tarlanah te hian 1.5 litre petrol khawl an lo hmantir tawh thin a. Maruti Suzuki 1.5 litre petrol khawl thar, 1.5 litre (1500cc bawr vel) K15C khawl hi a hma aia khawl hautak lo leh tui pawh hehlo a rawn nih tawh hmel a. Hei bakah hian automatic khawl duh tan chuan automatic transmission thar, 6 speed torque converter khawl a rawn nei tawh dawn a. A hma kha chuan automatic hoah hian 4-speed chauh a awm a ni.
An automatic transmission thar, he khawlin a rawn neih tel turah hian paddle shifter a awm tawh dawn bawk a. 6-speed auto hian gear ratio tha lehzual a siam belh a, hei bakah technology changkang tak hmanga duan a ni a, a khalhtute tan pawh manual mode mai bakah sport mode te a awm tel dawn bawk
Mizoramah chuan automatic hi kan la nei tam lo khawp mai a, hetihrual hian tunlai hian automatic transmission lei hi an tam chho viau bawk a, a awlsam leh khalh a hahdam bikna te hi kan intihhmuh chho zel pawhin a rinawm a. He automatic transmission thar rawn awm tel tur pawh hi phai rama automatic transmission hmang thang te tan chuan chanchinthar lawmawm tak a ni lehzual hle a ni.
Maruti Suzuki hian an khawl hrang hrang te hi tunlaia dan in a phut ang mil leh khawvel changkang zel milin an rawn tuaithar ve reng a. Tunah an lirthei chak tha deuh hoin an hman tur K15C khawl pawh hi khawl tha tak, neih manhla tak, tlo bawk si a ni ngei turah a beisei theih ang a, lirthei leitute tan pawh duhthlan tur tha tak mai Maruti Suzuki chuan an rawn chhawpchhuak leh ta a ni.