Tripura Chief Minister Biplab Kumar Deb-a nupui, Niti Deb chuan sorkarin venhimna a pek chu a hnawl thu a puang a, venhimna pek a duh tawh lo.
A thutlukna hi Facebook-a a page-ah Inrinni khan a tar lang.
A thutlukna a siam a puannaah hian sorkarin amah ven nana sum a sen chu coronavirus hripui a len laiin a mamawh zawk mipuiten an hman atan a ti tih Niti Deb chuan a tar lang tel bawk.
Chief Minister Deb hi ‘Y’ category protection pek mek a ni ve thung.
Tripura-ah hian chief minister hmasa, Manik Sarkar pawh khan venhimna a hmang ngai lo.
Sarkar-a nupui, Panchali Bhattacharya pawhin venhimna a duh ngai lo va, mi dangte ang bawkin zalen takin a leng mai thin.
Bhattacharya-i ang bawkin Niti Deb hi sorkar laipui hnuaia thawk a ni.
January thla khan assembly-ah Deb chuan kum 2018 atang khan a nupui, Niti Deb-i ven nan security personnel pahnih pek a nih thu a lo sawi tawh.