Kraws lerah chhandamna a lo thleng ta
Misual hrem tlak ngawih ngawih pahnih inkarah mifel tak, a sualna hmuh ve thung miah loh chu a awm a, an rilrua awm pawh a inang lo ngei ang. A sira mite pahnih chuan an khawvel hun an han chhuikir ngei bawk ang a, siamthat ngai leh kohkir duh ngawih ngawih pawh an va nei dawn em. Mahse, an tan khawvel hunbi a tawp a, an sualna nena an tawpna ni chhiar tur mai an ni tawh si!
A laia mi erawh chu a tirtu thu angin a awm a, mihring thinlung atanga ngaihtuah chuan huphurh taktein a huphurh thung a, a hma pawhin a thlante a lo tla bawrh bawrh tawh a ni. A hreh lutukna lamah a mittui hial a luang chhuak bawk. Mahse, a tirtu duh dana awm tur a nih miau avangin chhuan lo la awm zel turte tana amah chu inpe leh awm a nih miau avangin midang tana malsawmna thlentu nih chu a awm chhan a ni tih a hria a; ngawi rengin, a hrehna leh a lawmna pawh chu a inzat reng hial mahna!
Khua a sang zel a, thil mak a thleng ta. A vei lama mi chuan a laia mi chu a nihna a lo hriat ve zel zul tawh avang chuan tawngkam chhe tinrenga au in, intidam a, anmahni pawh tidam turin a hrilh a; mahse, chhanna a hmu lo. A dinglama mi erawh chuan a thianpa chu a khap a, an thiltih man hmu leh hrem tlak reng an nih thu a sawi a. Tin, a laia mi hnenah chuan a ram a thlen huna hre ve reng turin a ngen a. A ngen sual lo. A laia mi, sualna nei lo chuan a hnena a awm tur thu chawplehchilhin a hrilh nghal a, Kraws lerah chhandamna a lo thleng ta. A thih dawn thlenga chhandamna hna thawktu chu nang leh kei min tlantu Lal Isua hi a ni.