Afghanistan-a interior affairs ministry chuan hmeichhe naupangte chu secondary sikulah an luhtir chhunzawm leh tep tawh tih a puang.
Interior ministry thupuangtu, Saeed Khosty chuan Pathianni khan Al Jazeera hnenah a hun tur tak chu education ministry-in a la puan chian tur thu a hrilh.
“Ka hriat dan leh thu ka dawn dan chuan, hun reilo te hnuah university leh sikul zawng zawng hawn a ni dawn a, hmeichhe naupangte pawh sikul an kai ang a, hmeichhe zirtirtute pawhin an thawh chhunzawm thei ang,” a ti.
Taliban hian Afghanistan an lak hlim khan tleirawlte chu an tana zirna in kai a him hma zawng chu ina tawm rih turin an lo ti tawh a. Mipa naupang bikte leh primary school-a kai rual hmeichhiate pawh sikul an chhunzawm leh thuai thung.
Hmeichhe naupang lian deuh tawh chinte sikul kai an khap hian an rorel hmasak hun laia hmeichhia leh hmeichhe naupang zawng zawng lehkha zir leh hna thawh an khap hmiah ang kha an kalpui leh mai dawna rinna a lian hman hle.
Al Jazeera chuan, “Khosti-a hian secondary school-a kai hmeichhe naupang leh an hmeichhe zirtirtute chu an lo kir leh thuai tawh dawn,” a ti niin an puang.
Taliban hian kum 1996 leh 2001 inkar khan Afghanistan-ah hian ro an lo rel tawh a, hetih hun lai hian Muslim dan khauh tak kalpuiin hmeichhia an hrek nasa hle a. Tun tuma thuneihna an chan leh pawh hian hmeichhia leh khawvel ram tam takin an ngaichangin an ngaihven hle a ni.
Taliban hian Afghanistan-a thuneihna an chan leh phat atang khan an hun hmasa, 1996 leh 2001 inkara hmeichhiate laka rawng taka an chet dan ang kha hlauhthawnna a lian hle a. A hma ang a nih dawn loh thu sawi mah se rinhlelhna a lian hle tho.
Sorkar pisaa hmeichhiate thawhtir leh university-a hmeichhia leh mipa an then dan ringawt pawhin sawi a hlawh nghal.
Cabinet-ah pawh mipa hlang an dah a, a hnu lamah hmeichhia telh an ni dawn tih sawi mah se an lakah rin lohna a awm laklawh.
United Nations Secretary-General Antonio Guterres chuan tun thla tirah khan Taliban-in Afghan hmeichhia leh hmeichhe naupangte laka an intiamna a bawhchhia chu a dem thu a sawi a, mihring dikna chanvo ang an hmuh theih nana bei turin pawl hrang hrang a ngen.
Taliban-in hmeichhiate dikna chanvo an palzut thin hi an thenawm, Qatar leh Pakistan pawhin a lo sawisel tawh a, khawvel ram dangte chu inrawlha ngaihven turin an lo ti tawh.
Thla hmasaa thuthar lakhawmtute a kawmnaah Qatari Foreign Minister Sheikh Mohammed bin Abdulrahman Al Thani chuan Taliban-ten a hnungtawlh zawnga thil an kalpui han hmuh chu a pawi tak zet tih a sawi.
Al Thani chuan Taliban-te political office awmna, Qatar chu entawn atana hmang tura tiin, “Islamic system kan hmang a; mahse, hnathawhna hmun leh zirna in sangah hian mipate aiin hmeichhiate an tam daih zawk a ni,” tiin a sawi.
Pakistani Prime Minister Imran Khan pawhin Taliban kal dan chu rinhlelhawm a tih thu a sawi bawk.