Carlo Ancelotti-a Real Madrid in a hnuaia inkhel an hmachhawn tawh zinga an la hlauhawm ber tum tia chhal ngamin football an khel a. Shakhtar Donetsk 5-0 in an sawp.
Thawhlehni zana Kiev a Group D inkhelah Real Madrid tan Brazilian forward Vinicius Junior a che tha a. A goal hnih khung atang pakhat zawk ‘solo goal’ mawi a ni a, midang goal khung tur vawikhat siam bawkin Los Blancos tlarhma ti hlauhawmtu berah a tang.
Group match hmasa zawk a a vawikhatna atana Europe inelna lian khel Sheriff Tiraspol laka an mualpho hnuah Madrid an tho leh a, Pathianni zana Barcelona nen El Clasico an khelh tur inpuahchahna tha tak ni turin an chak.
Madrid in minute 37-naah goal hmasa ber an nei a, Lucas Vazquez-a ball cross chu Shakhtar captain Sergiy Kryvtsov chuan an lamah a ti lut palh.
Second half-ah Vinicius a inlar tan tak tak a. Minute 51-naah Luka Modric-a ball pass ‘world class’ tak mai chu goalkeeper Anatoliy Trubin ban phak lohin a khung a. Minute nga hnuah Dodo leh Kryvtsov te bumin goal sir kil tak atangin a khung nawn.
A hnampui Rodrygo goal khung tur siamsak leh bawkin huntawp dawnah Karim Benzema chuan match 11 atanga a goal 11-na a khung bawk.
Real boss Carlo Ancelotti chuan inkhel zawhah, “Player zawng zawng an khelhthat avangin pakhat chauh han fak bik theih a ni lo. Goal venah kan tha a, a tir atangin tum kan nei a, kan tum ang takin kan inkhel. Rang taka nawrlet kan tumin kan ti dik thlap thlap zel a, hei hian inrintawkna lian tak min pe dawn. Mahse Barcelona nena inkhel erawh inkhel danglam bik a nih thin angin tum dang anga ngaih ngawt chi a ni dawn lo.” tiin a sawi lawk.
Sheriff an tlawm ve ta
Inter Milan in vawi hnih chak tawh Sheriff Tiraspol chu 3-1 in San Siro-ah an hneh a, Italian team a vawikhat nan an chak.
Moldova club lakah Edin Dzeko chuan goal hmahruai a khung a. Second half a Sebastian Thill hmanga Sheriff in an chhanlet hnuah Inter tan Arturo Vidal leh Stefan de Vrij ten goal an khung.
Inter coach Simone Inzaghi chuan, “Inkhel awlsam a ni lova, kan khelhthat rualin hmasawnna tur a la tam.” tiin an inkhel a thlirlet.