Lunglei khawpui chhung Kawng

Lunglei khawpui chhung Kawng

  • Mahmuaka Chhakchhuak

Lunglei khawpui hi Rt-PCR khawl avangin tunlai hian news lamah a lang ngunin titi a siam tam hle mai a, Pathian zarah engtikah emaw chuan he khawl ropui leh riangvai tak pawh hi hman theiha kan la neih mai pawh ring ila a tha ang e. Chutiang deuh bawk chuan tunlai hian Lunglei khawpui chhung kawngpui chhiat lutuk avangin mipuiah titi a tam hle mai a, titia kan hriat dan chuan thuneitute lamin ruahtui hul huna siam atan an la nghak rih ni awm tak tein kan lo hria a. Nimahsela a chhiat dan hi a namen lo riau mai bawk si a, ruahtui hul kan nghah chhung hian hei aia a chhiat belhchhah zel pawh hlauhawm tak a niin harsatna dang a thlen pawh a hlauhawm a ni.
A bik takin Lungleiah hian sorkarna vawng fuantute lam MLA 4 lai an awm chunga hetiang taka kan khawpui hmel ti bal a, ti mawi lo thei khawpa khawpui chhung kawng a chhe thei hi thilmak tak a ni a, ngaihsakna dawng ngai reng reng lo a angin hmangaihtu nei lo ang maiin a chul rup mai hi a khawngaihthlak thei hial zawk mai. Hoticulture Office atanga Civil Hospital thlang vel phei leh Target bazaar phei vel hi chu tute emaw chuan Buh an phun leh duh mai awm mange tih tur khawpin tui a tling nasa a, kawngsira kea kalte tan ngei pawh hrehawm khawpin tui a tling tam a ni. Hetiang a ni chunga ram hruai tura kan thlan tlinte lah chuan thawm an neih reng reng kan la hre loin mipuite leh lirthei khalhtute tana thlamuanna thu lawmawm lam an sawi kan la hre hauh lo hi thilmak tak a ni awm e.
Leitlangpui a chul dawn lo kan ti a, Leitlangpui nula nalh ziate pawh hahipin kan lo sawi ve tawh thin nain hetiang taka khawpui chhung kawngpui bera tuihawk a tlin nasat hi chuan kan Leitlangpui hi a chul chu a ni mai lawng maw tih tur a niin a chhunga chengte tan ngei pawh pawn chhuah huphurhawm khawpin a chhia a, kan chhuak lo thei lo bawk si nen hrehawm duh tak a ni a. Leitlangpui nulate erawh an la nalh viau nain anni tan pawh hetiang taka khawpui chhung kawngpui ber rulngan pa ang zar mai a nih tak chiah lohah leh tuihawk chil per mai mai ai chuan mahni inluma tawm sen reng mai loh chuan pawn chhuah huphurhawm tak a ni bawk si. Lirtheia kal pawhin kan indai per ngei ngei ziah bawk a, dai per lohna turin duhthlan tur a awm chuang bawk si loh avang hian inthlahrun a na duh em em thin a, a zia lo takzet a ni.
Kum 2018 kum tawp lama Aizawl khawpui chhung kawng siama kan sorkar tharin chak tak maia hma an han la a, hna an han thawk tak tak mai kha chu mipui pawh kan phurin kan sorkar tharah pawh rinna kan nghat nasa hman viau a ni a, nimahsela Second Capital of Mizoramah erawh chutiang a ni ve ta chiah si lo hi a zia lo hle maiin heti taka khawpui chhung kawng a chhiat reina chhan hi ram hruaitute chaklohna a nih lohin enge kan puh chuan ang ni? Lunglei khawpuia MLA kan neihte hi MLA fang pakhat mah an niloin kan sorkarah mi pawimawh tak tak vek an ni a; Minister kan nei a, HPC Board Vice Chairman kan nei bawkin MYC Chairman kan nei bawk a, Pakhat pawh bamboo Development Board Vice Chairman a ni bawk a. Anni tello hian kan sorkar hi a kal thei lo mai ang a tih tur khawpa mi pawimawh an ni nachung hian anmahni thlang tlingtute chen khawm tamna ber Lunglei khawpui chhung kawngpui chu heti khawpin a chhe bawk si a, manganthlak tak a ni.
Bial an ngaihsak lo, anmahni thlang tlingtute an hre tawk lo ti dawn ila Silpauline an sem thawm erawh kan hre reng thung bawk si a, thenkhatte chuan Arte an vulh tir nitein kan hre bawk a, chuvangin mimal hnen lamah chuan an lo luangchhuak viau pawh ni tein kan han hria a. Chutih laia hetiang tak maia Lunglei khawpui chhung kawngpui a chhe si hi chu a dik chiah lo a, an luanchhuah dan leh bial mipuite an ngaihsak dan hi a rualrem chiah lo a ni. Nge ni mipui lam hi kan au ring tawk lo em ni a, hei aia ringa au ala ngai zawk dawn em ni dawn. Rt-PCR khawl chungchangah kan dem em em tawh laia khawpui chhung kawng chhiat vanga kan dem nawn leh kher hi thil tul pawh niin alang zo zai tawh lo a, nimahsela hei chen khawpui chhung kawngpui a chhe tawh tlat bawk si a.
Ngawih liam mai mai chi pawh a ni lo a, khaw kar kawng nena khaikhin chi pawh a ni hek lo. Khaw kar kawng tha lo chu a pawi em em rualin engtin tin emaw tihdan ala awm theih hmel zawk a, khawpui chhung kawng chhia erawhchu mipuiin kan tawrh bik tlat avangin a ngaihna a awm hlawl lo. Nunau leh kum upa lam leh mi chak lo ber thleng pawha nitina kan veivahna a nih tlat avangin a pawimawh em em bik a, damlohna thilah leh hmahmawh thilah phei chuan kawngpui tha lo chu a huatthlaawm bik bawk a ni. Chutiang a nih reng laia Lunglei khawpui chhung atanga MLA 4 lai kan neihte hian thawm an la nei lo hi enge a chhan ni anga, mipui lam authawm hi ala ring tawk loin an bengin ala hre phak lo em ni zawk ang? Mahni bial chhung pawh heti khawpa an hlamchhiah a nih phei chuan Inthlan lehah hian tlin an tum tawh lo zawk em ni te pawh a tih theih bawkin, chutiang chu lo ni pawh nisela heti hi chuan hmingtha taka an chawlh theih hi a rinawm chuang hauh loh.
Kan hriat dan chuan PWD lam hian resurface-na turin pawisa an nei lo ni awm tak a ni a, a dik chiah em kan hre lo nain lo nei lo tak tak pawh nisela MLA Fund atangte pawh hian a theih mai lawm ni, a nih loh pawhin HPC hian hemi atan hian sum a nei lo nge. Chutiang sum a awm lo a nih pawhin kan MLA te hi sorkar-a mi pawimawh tak tak an nih angin sorkar lamah pawh a dil dan kawng an hre ngang lo em ni ang le? Engpawh chu lo nisela heti tak maia Lunglei khawpui chhung kawngpui a chhe chunga ram hruaitu mi chhuanawm leh fel tak tak kan neihte an ngawi reng thei hi a mak reng reng a ni.

Leave a Reply

Your email address will not be published. Required fields are marked *

error: Content is protected !!