ZING THAWH by L Liandinga

ZING THAWH

  • PL Liandinga

Hripuiin min nuai hma atang tawhin mi tam tak chu zingah kan tho hma lo hle mai a. Tlangval tam tak phei chu an naupan tet atanga zinga tho ngai lo, chhungten an kaihthawh ngai loh, nupui fanau an neih hnu emaw, an la neih loh emaw pawh a zing tho ngai reng reng lo an ni a. Tul tawpah leh loh theih loh thilah chauh an tho chhuak a, chuti te a nih em loh chuan zing lama tihtur tlangpui chu, ‘Zingah ti lo ila,’ tha deuhvin an ti mai a. Zing a tihtur chu pumpelh dan an zawng ngar ngar a, a man pawh an ngaihtuah tawh chiah lo. Zinga tih ai chuan tih loh mai an duhna chu lian tak a ni zel.
Hripuiin min han nuai a, Lockdown te kan han hmelhriat a, tam tak tan chuan zing mut reina chhuanlam tha te mai a ni theiin a lang a. Mut thlahlel zual deuh phei chuan khatia Lockdown kan han ti vel te kha nuam an tih phian te pawh ka ring deuh a ni. Lockdown chhuanlama hmang a, vawiin thlenga tho tlai ta hi kan awm nual awm mang e ka ti. Zinga kan thawh tlai hian zan lamah hna thawk ila chu thudang a ni. Khawvel hmun danga zing tho tlai kan tih tam tak chu zan lama hna thawk rei an ni a. Keini erawh chu englai pawhin zan dar sarih vela inkhawm tura tlai dar nga vela in thlen ngei ngei duh kumkhua kan ni titih a. Zan lama hnathawh hi chu kan Mizo Kristianna kalphung nen hian a inrem ve thei tak tak lo. Chuvangin zingkar hi kan tan a pawimawh lehzual a ni.
Tunhma, hetianga eizawnna bul fuk leh sorkar hna te, company hna te leh eizawnna chi hrang hrang awm hma atang tawhin Mizovin hlo thlawh ngawt eizawnna kan neih lai atang tawhin zinga tho lo chi hi awm a ni a. Dan naranin zinga tho ngai lo pa chu zinga tho thin ai chuan an hnufum tlangpui. Chu chu han en mai pawhin a lang a, thil nih dan tur dik tak pawh a ni. Tuktin miin darkar hnih vel a hloh ziah emaw, midang aia a neih belh ziah emaw chuan anmahni-ah danglamna awm lo thei lo a ni. Thingtlang hnathawhna lamah phei chuan chempui tal a inhriam hleih ngei ngei tur a ni a, chempui hriam leh hriam lo chu inkar hlat tak a ni. Thingtlang lo nei mi tan chuan chempui hriam te, hreipui hriam te, chemkawm hriam te chu a bil ai chuan nasa takin a hman a nuam a, tha tam tak hen a ni a, phur leh phur lohna hriltu a ni. Mahse zing thawh hma viau tawh pawh a chem tah hriam nachang miin a hriat miau loh chuan thudang le.
Zing thawh tlaiin a nghawng lian tak pakhat chu YMA a ni. YMA chu eizawnna hun la hek lova khawtlang leh midang tana rawngbawltu pawl a ni a. YMA hruaitute zing an thawh theih miau lohva, zing lamah kan hnatlan theih tawh miau loh chuan YMA tan chuan tihtur a vang viau a ni. Sorkar hnathawk thlira inrinni, pisa kai loh ni a hnatlan han rawt ngawt hian kut hnathawk mi leh khawpuia inhlawhfa tam tak tan chuan buaithlak tak a ni a. Tuk hnih tuk thum leka tunhma YMA-in an tih zawh mai thin ang kha nileng hnatlang rawt ngawt loh chuan a lo tih theih tawh hauh lo mai a, YMA kha hnathawh kawngah a inlungrual hleih theih tawh thin lo.
Kum li kalta vel khan sorkarin Aizawl khawpui Traffic Jam awmdan thlirin sikul tan hma tur a ti a. A that tehlul nen mi thenkhat an phun a. Sorkar thar lo piang leh chuan a titawp leh ta a. Pawi hi ka lo tih tehreng nen tuna kan Minister te zinga pakhat hian sorkar thiltih that chhuan tlak zingah a sawi ta fo mai a. A zia lo ka ti hle. Zofate hi nikhata darkar tam zawk hna kan thawh theihna tur leh ni kan hman rei theihna tur ngaihtuah hi sorkar tihtur pawimawh tak a nih laiin nikhat chhunga kan hun neih sorkarin a pawt tawi ta kha thil pawi takah ka lo ngai a. Kan duh ber chu mut rei a ni a, chumi piah lamah chuan sorkar hnathawk thenkhat pisa kai hun nena inrem tura thil tih a ni. Mipui tam ber leh a ram pum hmasawnna aia tute duh lo au thawm ring deuh emaw laka duap kan kaih zel mai anga lang kha kan tuar leh dawn a ni.
Chutih lai chuan Central India lam, keini aia ni chhuak a tlaina hmunah chuan hnathawktu tam takin zan dar sarih te an thleng a, keini angin dar li leh a chanve velah hian an phu ve nghal sup sup lo. Insawi khawngaihthlak a, mite lainat anga inlantir a, a hnathawh darkar titlem zawng te, a chhiah chawi lo zawng te, a bill pe tlem zawng te, a sorkar tihek zawng te a kal hi kan hnam tan a pawi hle a. Heti hi chuan kan tê tawlh tawlhin a rinawm. Kan tlawmngai pawl chhuan ber leh lian ber, hunawl hman that thupuia neihtuten zingkara engmah an tih theih tawh loh chuan kan hnam kalphung hi thui tak a danglam ka ring a. Zing lamah keini aia ni hmu har fe zawk te kan el tlat a, kan entawn tlat chuan hma kan sawnpuiin ka ring lo.
Kan hnathawh darkar hrim hrim hi kan tihtam a ngaiin ka hria a, zan lam awm awl nana darkar sawmpahnih vel aia tam kan han ruahman te, zan lam zawng zawng kohhran tana kan han dah titih mai te hi a uiawm a. Thawkrim lova hmasawn thei hnam ka hriat ve miau loh avangin thawhrimna lam hawia thalai kan inzirtir hi a tul hlein ka hria.
Mimalah pawh zing tho hma chi chu thawhpui leh rorelpui an nuam duh chawk a, zing lama engmah tihpui theih loh nena thawhho chuan hna a sawt duh vak lo.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427