India chuan êng leh rawng nen, mi maktaduai telin Hindu kûtpui, Diwali an lawm mek a. Hei hi coronavirus hripui avanga a tawrhna a ziaawm tan mek lai leh boruak bawlhhlawhin a tuam tan leh mek lai a ni.
Ruai, tawngtai leh halmawi hunpui, Diwali hi India-ah chuan kut pawimawh ber pakhat a ni a. ‘Eng kut’ tia hriat thinah hian mipuite chuan khawnvar leh êng dang chhiin êngin thim a hneh leh thatnain sual a hnehna an entir thin.
Kuminah bik hian mi maktaduai tel coronavirus-in hrehawm taka a hrek hnuah nun dan phung pangngai an zawh leh tanna nen he kut hi an lawm dan a dang deuh.
Thla khat liam ta chhungin hri kai hmuh chhuah an tlem a, khawvela tuar na ber pakhat, India-ah hian sorkarin a chhinchhiahnaah chuan mi maktaduai 35 chuang hri kai awm tawhin mi 4,50,000 chuang an thi tawh.
Mi tam tak tan Diwali hi kum thar a ni bawk a. Khawtlang nunah an zalen lai, intihhlimna huaihawt hun, thian leh chhungkhat intlawh kual hun leh thilpek inpek hun a ni.
Diwali lawm hun hi kum tin inthlak thin a ni a, thla awmna azira siam rem thin a ni a; mahse, a tlangpuiin October leh November-a hman thin a ni ber a. Kuminah hian Ningani kha a ni.
Nikum ang bawkin coronavirus hripui avangin Diwali-a an tih thin tam tak chu kuminah pawh tih theih loh a ni leh a. Sorkar chuan mipuite chu punkhawmna lian huaihawt lo tur leh mi tamna hmuna awm tam lo turin an ngen a. Mi tam tak chuan lawmna lian tham lem lo huaihawtin temple-a tawngtang bakah online-a inkhawmna hun an buatsaih hlawm.
Hetih lai hian khawpui ber, Delhi-ah chuan bazar a lun hle a. Heti luih luih hi a nih avangin mi thiamte chuan India rama damdawi in indaih lohna thlen hun lai ang maia hri inkai darh leh chiam a thlen an hlau hle.
India-a Covid-19 a vang lai, April leh May velah khan damdawi in indaih lohna a nasa hle a; oxygen, damdawi leh inenkawlna hmanraw dang indaih lohna pawh a nasa hle bawk.
Tun dinhmunah erawh khawtlang buaina lian kha ziaawm tawhin ni tin mi 10,000 leh 12,000 inkar vel kai hmuh ziah ang chauh a ni tawh a, May thlaa 4,00,000 vel lakah chuan tlem tak a ni tawh.
Dinhmun tha angin lang mek mah se mi thiamte chuan mipui an inthlahdah chuan a thawh thumna thleng thei reng a nih thu an sawi.
Covid-19 chauh hi India-a buaipuiawm a ni lo va. Halmawi hal nasat thin a nih avangin kûtpui leh a hnu lamah hian boruak a chhe zual em em ziah.
Boruak bawlhhlawh hi Delhi-ah a nasa zual thin a, khawpui chu meikhu leh boruak tha lovin a tuam hlup reng a. November leh December hi an thenawma Punjab leh Haryana-a lo neituten an thlai sengna ro an hal hun lai a nih bawk avangin a zing chhah zual thin.
Khawvel hmun hrang hranga zirnaah chuan boruak bawlhhlawhna hmuna Covid-19 kai a awlsamin thihna pawh a thlen tam zawk niin hmuh a ni.
Diwali hma hian state eng emaw zat chuan halmawi leh halpuah lam hai hi an khap a, thenkhat phei chuan an khap hmak a. Hetih rual hian tun hma pawhin khap a lo ni tawh thin a, a hlawhtling lutuk ngai lo thung.