India Independence vawi 75-na lawmna Azadi Ka Amrit Mahotsav (AKAM) puala Art & Culture Department leh Mizoram Cycling Asscociation buatsaih, Azadi Ka Amrit Mahotsav India @75 Cycle Rally chu nimin zing khan Renu Sharma, Chief Secretary-in Vanapa Hall kawtah a vailiam.
Vanapa Hall kawtah hian Art & Culture Director Pu R. Hmingthanzuala kaihhruaiin programme tawi hman a ni a. Chief Secretary chuan thu sawiin India ram zalenna kum 75-a lawmna atan Art & Culture Department-in programme a buatsaih chu lawmawm a tih thu a tar lang a. Kumin March 12 khan Azadi Ka Amrit Mahotsav India@75 hi prime minister-in a hawng a. Mizoramah pawh Art & Culture Minister R.Lalzirliana hovin Govt. Aizawl College leh Govt. Hrangbana College zirlai te nen hemi zing hian Freedom Walk neih a ni.
April 1 khan chief minister hovin Vanapa Hall-ah AKAM pual programme hman a lo ni tawh bawk a. Chuta \ang chuan Art & Culture Department hian programme hrang hrang buatsaihin chumi zinga pakhat chu cycle rally hi a ni tih sawiin A&C Department hotute leh Cycling Association hruaitute chungah lawmthu a sawi.
Cycle rally-ah hian mi 75 an tel a. Vanpa Hall a\angin hmar lam zawnga tlanin Chanmari-Ramhlun-Bawngkawn-Thuampui-Falkland-Chite-Mualpui te an tlan tlang hnuah Silai Mual, Trinity Hospital kawtah an tawp a. Carol VLMS Dawngkimi, Jt.Director A&C-in lawmthu sawiin rally hun hnung a khar a ni.