Central YMA hnuaia thuneitu sang, Central Co-ordination Committee (CCC), nimina thukhawm chuan General Conference vawi 73-na chu kumin chhung ngeiin Central YMA thlen turin Aizawl khawpui chhungah neih an rel.
CCC vawi 92-na, Chanmari YMA Hall-a neih hi Central YMA President Vanlalruata’n a kaihruai a, YMA General Conference 2021 neih chungchang sawiho a ni.
YMA General Conference 2021 neihna hmun tura ruat lawk tawh, Bilkhawthlirah hripui leng avangin neih theih a nih dawn tak loh avangin kumin chhung ngeiin Central YMA thlen turin Aizawl khawpui chhungah neih nise, an ti a, hemi atana tul dangte chu CEC bawhzui turin an dah a ni.
‘General Conference neih huna rorel tur agenda thlitfimna neih a nih bakah CYMA Budget 2021-22 ruahmanna chu Treasurer Fabian Lalfakawma hnen atangin ngaihthlak a ni a, conference ah pharh nise’ tih a ni. CCC-ah hian YMA Sub.Hrqs/Group leh Branch atangin palai 252 an kalkhawm a ni.
CYMA General Secretary Prof Lalnuntluanga’n report a pek atanga a lan danin, Covid-19 hripui leng mek avangin CCC hi tum nga neih theih loh a nih bakah rorel inkhawm pawh nikum 2020-ah neih theih a ni lo.
YMA General Conference neih hnuhnung bera rorelte bawhzui a nih dan bakah, hripui leng chungchang, Mizoram ramri buai chungchang leh raltlan chungchanga hmalakna hrang hrangte tar lan a ni.