Covid-19 kai enkawltu doctor-in hri kai dam tawhte chu taksa sawizawi leh hnathawh kawnga chin tawk hre tur leh fimkhur taka inenkawl turin a chah.
Zoram Medical College, Covid Task Force Nodal Officer Dr PC Lalramenga chuan Covid-19 kai, negative tawhten taksa sawizawi leh hnathawh kawngah chin tawk an hriat a pawimawh tih chanchinbumi thenkhat hmaah sawiin, hah tak leh thlan tla bawrh bawrh khawpa thil tih loh rih a pawimawh a, taksa insawizawi leh hnathawh dan chanve vel tala tih rih a ngai tih a sawi.
Covid-19 chu virus a nih avangin taksa kawng hrang hrangin a nghawng thei a, khawvel hmun hrang hrang leh Mizorama kai, negative tawhte atangin hei hi a takin an hmu mek tih a sawi a, “Kan tawnhriat leh zirchianna awm tawh zingah Covid-19 hrikin a khawih nat ber chu chuap a ni a, heng bakah hian lung, tihrawl leh ruh chuktuah, thluak leh rilru lamte hi a khawih nasat zual a ni,” a ti.
He natna hian mihring chuap a khawih nasa a, hri kai dam tawhte pawh an inenkawl uluk a ngai hle tih sawiin, he natna hrik hian a kaite chuap a lo khawih chhiat nasat hman tawh chuan harsatna lian tak an tawk thei tih a sawi.
Natna hrikin thisen zama thisen kal lai a tihkhang theih avang leh thisen kaltluang lai a danchah theih avangin lung natna chi hrang hrang bakah heart attack neih thut a thlen thei tih Dr Ramenga chuan sawiin, “Tihrawl leh ruh chuktuah na thumte bakah depression leh anxiety thlengin a thlen thei,” a ti.
Hengte avang hian hri kaite chu an negative hnuah pawh regular takin medical check up nei thin turin a chah a, doctor-ten ‘a him e’ an tih hma chu inenkawl uluk hle turin a chah.
Covid-19 kai tawhte chu ei leh in lamah pawh insum a tul a, zuk leh hmuam tih loh bakah thau leh mawm ei lohte a pawimawh tih sawiin, thei rah leh thlai rah lam ei uar a tul tih a sawi.
Dr Ramenga chuan hri kai tawh, dam tawha lang harsatna tawkte chu an inentir dawnin specialist doctor kher an rawn a tul lo tih sawiin, doctor tu pawhin an enkawl thei tih a sawi bawk.