Gujarat-ah Rs. Vbc 88.25 man ruihhlo man


Mipa kum 44 mi chu Devbhumi Dwarka district, Gujarat-a heroin leh methamphetamine Rs. Vaibelchhe 88.25 man vel a kawl nen man a ni a. A ruihhlo kawl hi Pakistan atanga tuipuia kala a lak luh a nih a rinawm thu police officer chuan a sawi.
An mi man hi Thane district, Maharashtra-a mi, Sajjad Ghosi-a a nih thu Nilaini khan a sawi a. Khambhalia-ah kalin a unau mipa pahnihte hnen atanga la angin a insawi.
An man hun hi Thawhlehni kha niin a ruihhlo ken hi kg 17.65 zet a ni a. A unau a sawite pahnih pawh Nilaini khan Salaya khua, Devbhmi Dwarka district atangin an man zui a, ruihhlo ni ngeia hriat packet 47 an lo la kawl bawk tih Rajkot range-a police officer Sandeep Singh chuan a sawi.
“Thu kan dawn bawhzuiin Sajjad Ghosi-a hi Khambhalia khuaa khualbuk atangin Thawhlehni khan man a ni a. A ipah ruihhlo packet 19 – heroin kg 11.483 leh methamphetamine kg 6.168 a kawl hmuh a ni a. Salaya-a a Kara unaute hnen atanga a lak niin a insawi bawk,” a ti.
Ghosi-a chuan a ruihhlote hi Salim Kara leh Ali Kara hnen atanga lain Thane panin a haw leh mek tih police a hrilh.
“Kara unau chenna luhchhuah lehnaah hetiang bawk hi packet 47 man leh a ni a, khawi atanga an lak nge tih chu a hriat rih loh. Ghosi-a hi tun hmain tualthah thubuaia lung in lo tang tawh a ni a, Salim Kara hi NDPS, pawisa lem leh Arms Act thubuai lo nei tawh a ni,” tiin Singh chuan a sawi.
Ghosi-a hi Thane-a Mumbra vengah thlai zuar a ni a, ni thum kal ta khan Khambhalia-ah hian kalin ruihhlo hi a la niin a sawi.
A chhui hna hi an thawk mek zel a, tuna an hriat leh rin dan chinah chuan ruihhlo hi Pakistan atangin Gujarat-ah hian Kara unau hian tuipui kaltlangin an lak luh a nih a rinawm thu DIG chuan a sawi.

Leave a Reply

Your email address will not be published. Required fields are marked *

error: Content is protected !!