UFC weight division hnih champion hlui Conor McGregor chuan tunhnaiah social media lamah training a nei ngawrh leh tawh tih tilangin Octagon luh lam a sawi ri leh tan a. A khingpui leh tur inrinsiakna awm leh tawhin UFC fighter lar pahnih Max Holloway leh Michael Chandler ten Irish fighter hmachhawn an cho.
Featherweight champion ni ve ve tawh Max Holloway leh McGregor te hi UFC-ah lo inhmachhawn tawh an ni a. Kum 8 kalta khan hriat an hlawh tam hma in UFC Fight Night 26-ah an intum a, McGregor-a khingpui tur Andy Ogle chu Hollway hian thlakin unanimous decision in McGregor a chak zawk.
Fighter pahnihte hi social media kaltlanga incho zeuh zeuh reng an ni a, tun kartawp a Yair Rodriguez nen intum tur Holloway chuan an intum nawn leh theihna kawng a inhawng tih a sawi.
“McGregor tum thei zingah hian ka awm reng. UFC-ah boxer tha ber ka ni a, Conor hian Nate Diaz te, Dustin Poirier te a sawi fo reng a, mahse UFC hnenah pawh kal ula, tunge hralh tla ber tih zawhna zawt ula min sawi tel ngei ang. Las Vegas-ah T-Mobile Arena emaw Raiders stadium ah mipui khatin kan pahnihin kan hralh thei ang. Tunah chuan Yair ka hmaah a awm a, ka chinfel hnuah helam hi kan thlir ang.” a ti.
McGregor pawhin Holloway hi tum a chak thu a lo sawi tawh thin a. “Max hi phur takin ka tum leh ang, Calvin Kattar a hneh dan khan fighter tha ber zing ami a nihna chiang takin a lantir. A sang a, 155-ah vawikhat chiah la inel mahse a hlawhtling thei. Kan intum leh a nih chuan 155-ah a ni ang.” tiin January thla khan a lo sawi tawh.
Hetihlai hian lightweight fighter dang Michael Chandler pawhin McGregor a tum duh tih social media-ah a sawi a. Lightweight title chuhtu ni tura intlansiaknaah Justin Gaethje chu Pathianni khan hneh lo hlim mahse Chandler hian Irish fighter hi tum a duh a, an pahnih thlalak siamchawp chu social media-ah tarlangin nakkum a intum turin a cho.
McGregor chuan, “Engtikah emaw intum hun nei turin ka inpeih reng e. Hman zana i fight-ah pawh i inlan tha hle, ka lawmpui a che.” tiin Chandler hi a chhang.