Scottish club Rangers manager Steven Gerrard chu Premier League a manager nei lova awm lai Aston Villa in manager atan an thlir uluk hle a, Midlands club hian lakluh tumin an dawr dawn.
Villa hian an manager Dean Smith chu Pathianni khan a hna atangin an ban a. League-ah a zawna vawi nga an tlawm hnuah coach thlak hun tiin thutlukna an siam.
A thlaktu tur ngaihven nghalin tunkar leh karleh a international football khelh avangin club lamin awl lai an neih chu remchangah lak an tum a. November 20 a Brighton & Hove Albion nen an inkhelh hunah manager thar neih ngei tawh an tum.
Gerrard a buk a rit
Scotland a hna a thawh avangin Liverpool legend hian fak a hlawh a, an hmelma Celtic thlazar hnuaia an awm reng hnuah Rangers muthlu kaithovin Scottish title a lakpui a. Celtic lalna rei tawh tak chu a titawp. Hei vang hian Villa hotute mit a la hle a, amah Gerrard hian England a hnathawh theihna hun hi a bawhpelh lo turah an ngai.
Villa chief executive Christian Purslow chuan Gerrard hi an coach thar ni tura a duhthlan a ni a, Liverpool managing director a nihlai atang tawhin an pahnih inkar a tha.
Anfield-ah Gerrard hi a club hluiah manager hna thawh hun la nei ngei tura ngaih a ni a, chutihlaiin Premier League a hna thawh hi a tan thil chaawm tak a nih a rinawm a, Villa hi tunhnaia English club zinga sum seng ngam, an dinhmun chawisan tum a hmathlir nei thui ngam zing ami an ni bawk.
Gerrard hian kum 2024 thleng Rangers-ah hian contract a nei mek a, Scottish champion lai hian season laihawlah chhuah tir mai an phal dawn lo chiang. Chutihlaiin Villa in ‘compensation fee’ pek an inhuam chuan an manager hi chelh beh theih a ni dawn lo tih an hria. Gerrard-a contract a compensation fee hi Pound maktaduai 2.5 vel ni tura ngaih a ni.
Liverpool-ah Jurgen Klopp-a’n kum 2024 thleng contract a la neih ve bawk avangin Gerrard hian Aston Villa a hna lo thawh phawt hi a thlang dawn niin British football lam mi thiamte chuan an ngai.
Aston Villa tana ngaihtuah tur dang awm pakhat erawh Gerrard-a thawhpui turte an ni a. An lalut thei a nih dawn chuan a coaching staff an tihfel a ngai.
Gerrard hian Rangers-ah thawhpui bik coaching team a nei a, heng coach-te nen hian an thawhhona a tha a, an pu ber hi an zui ngei a rinawm hle.
Heti hi a nih chuan Villa hian assistant manager Gary McAllister, coach pahnih Michael Beale leh Tom Culshaw te bakah fitness coach Jordan Milsom chu an lakluh tel a ngai dawn.
Midang an ni thei ang em?
Gerrard-a hming a ri ring fal a, mahse Villa hian manager dang pawh an ngaihven tel reng a. Heng zingah hian Southampton boss RalphHasenhuttl leh Belgium coach Roberto Martinez te an tel.
Brighton enkawltu Graham Potter pawh a hnathawh avangin dahsan a ni a. Villa assistant manager thin John Terry hming pawh sawirik a ni a, mahse a kum lamah a la naupan bakah manager anga tawnhriat a la neih tam loh avangin Terry hi chu midang aia buk rit lo zawk tura ngaih a ni thung.
Denmark manager Kasper Hjumland sawirik a ni tel a, mahse ani hi chuan England a hnathawh aiin Denmark enkawl a thlang zawk niin an sawi ve bawk.