Aizawl: Kumin thla kua chhungin Mizoramah sikserh vei mi 4,727 hmuh chhuah a ni tawh a, thih phah mi 10 an awm tawh.
State Vector Borne Diseases Control Programme (SVBDCP) chhinchhiah danin, kumin January atanga September inkarah mi 2,19,040-te chu sikserh an vei leh vei loh endik an ni a, chung zinga mi 4,727-in sikserh an vei tih hriat chhuah niin, nunna chân hi mi 10 an awm tawh a ni.
SVBDCP chuan tunlai hian Mizorama malaria tamna hmunah thisen test rûnpui an nei mek a, Malaria test rûnpui hi district pathum – Lunglei, Lawngtlai leh Mamit chhunga khua, mi cheng 1,000 zela malaria vei mi panga aia tam awmna khuaah te kalpui a ni.
Lunglei district chhungah mi 156 endikah sikserh vei hmuh chhuah an awm lo a, Mamit district-ah mi 2,766 endikah mi 26-in Malaria PF leh mi paliin PF, an vaiin mi 30-in sikserh an vei tih hmuh chhuah a ni a. Lawngtlai district-ah mi 4,064 endikah PF vei 46 leh PV vei mi 11, an vaiin mi 57-in sikserh an vei tih hmuhchhuah a ni.
Tun tuma malaria test rûnpui an neihna khuaa mipui zaa 90-te hi tuam chhuah tum niin, a vei hmuh chhuahte chu a hmunah a thlawna damdawi pek nghal zel an ni. Sikserh vei hmuh chhuah loh emaw, inthehdarh zel tur ven nan emawa he hmalakna hi kalpui a ni a; district lama health department thawktute leh state-a thawktute nen he hmalakna hi uluk takin kalpui a ni.