India khawpui, New Delhi-a thunietute chuan boruak bawlhhlawh lutuk laka mipuite an him nan khawpui chhungah ‘pollution lockdown’ a puang a. Chawlhkar khat chhung chu sikul pawh khar a ni dawn.
“Naupangten boruak him lo an hip luh loh nan sikulte chu khar a ni ang,” tiin Chief Minister Arvind Kejriwal chuan Inrinni khan thuthar lakhawmtute a hrilh a, ni li chhung in leh thil dang sakna lam chi pawh an chawlh dawn.
Sorkar pisate pawh in lam atanga hna thawk tura tih a ni a, mi mal sumdawnna pawh a theih chen chenah hetiang hi kalpui turin an ti bawk.
Delhi hi khawvela boruak a bawlhhlawhna ber khawpui a ni a. Thil siamna hmun leh lirthei khu chu a tibawlhhlawhtu bera puh a ni a, lo neituten an thlai sengna ro an hal khuk chu a chhan lian a ni bawk a. Kum tin thlasik lai hian mi maktaduai 20 chuang chenna khawpui hi boruak khuin a bawh reng zel a ni.
Inrinni khan Supreme Court chuan boruak bawlhhlawh lutuk tihziaawm nan inkharkhip puang mai turin a rawt a, “A nih loh chuan engtin nge kan nun zel ang?” tiin Chief Justice N.V. Ramana chuan a sawi.
Kejriwal-a sorkar chuan court thutlukna hi ngaihtuah nghalin a khawih buai theih mi hrang hrangte nen inrawn tlangin thutlukna an siam zui a ni.
“Pollution lockdown hi a hmain la tih ngai loh a ni a, rahbi harsa tak a ni dawn a ni,” a ti.
Central Pollution Control Board pawhin Zirtawpni khan thuneitute hnenah hian boruak bawlhhlawh lutuk tihziaawm a nih theih nan inkaihhruaina kalpui turin thuneitute hi a lo rawn tawh bawk.
Boruak bawlhhlawh takin Delhi a tuam hi November 18 vel thleng tal ni tura ngaih a ni a, zan lama thli chak vak lo thaw thin chuan a ticham reiin hmun dang atangin a chhem lut nasa niin an sawi.
Inrinni khan Delhi-ah hian boruak bawlhhlawh dan an sawina, boruaka PM 2.5 particle awm zat chu 300 a kawk phak a. Hei hi World Health Organization-in mihring hip luh atana him a tih chin aia a let 20 chuang maha sang a ni.
Khawpuia chengte hi chawlhkar khat chuang chu tuk tin boruak zing phui chuk hnuaiah an tho chhuak tawh a. Khaw hmuh theih chin pawh a tawi a, thenawm state-a lo neituten an thlai sengna ro an la hal nasa lo zawk a, an hal tak tak hunah chuan kumin hi boruak a bawlhhlawh ber kum a nih hial rin a ni.
Delhi-a boruak bawlhhlawh lutuk hi kumtam tak chhung chu sorkar apiangin tihziaawm tumin an lo intiam tawh a, hmasawnna erawh a awm lo mai ni lovin a bawlhhlawh tawlh tawlh a ang zawk.
An thenawm state-a lo neituten nipui thlai an sengna ro an hal thin chu thlasik laia a tibawlhhlawhtu ber pakhat a ni a, Supreme Court-in khapsak mah se a ziaawm thei lo.
Lo neitu sang telin an thlai sengna ro hi an hal thin a, hei hi thlasik intan dawna nipui thlai an sengna ro an hal ziah thin a ni a, an lote tifaiin thlasik laia chin thin thlai, wheat leh a dangte ching tura an inbuatsaihna pakhat a ni.
Sorkarin a chhinchhiah dan chuan kumin hi kum li?liam ta chhunga lo neituten an thlai sengna ro an hal nasat ber kum a ni nghe nghe.
Delhi sorkar hian kumin kum tirah khan ‘smog tower’ an tih chu an bun a, hei hi fan lian tak 40 awmna niin second tin boruak tihfai sa cubic metre 1,000 chhem chhuak thei a ni.
$ maktaduai hnih zet sanga siam tower hian boruaka mihring tana him lo thil a zahve zet a tikiam thei a; mahse, engineer-te chuan square kilometre khat vel chauh a tuam phak niin an sawi thung.
Swiss pawl pakhat, IQAir-in kum 2020-a zir chianna an neihah chuan khawvela khawpui boruak bawlhhlawh 30 zinga 22 chu India khawpuite an ni a, Delhi hi khawpui boruak bawlhhlawh ber nihna hauhtu a ni bawk.
&&&&&