RAM HRUAITUTE LEH MIPUI SUKTHLEK

  • RALTAWNA

“A thuah a thuaha min ven hnuah kan lawm zawng leh min fakna thu sawi turte chauh lo chu kan hmu ngai lo a nia, kan mawl vek mai a ni,” ti ang deuh hian pu C Chawngkunga khan minister ni chunga thil hriat fuh loh a awm theih dan a sawi an ti a. Tak tak a nih leh nih loh chu ka hre lo a, va zawh chi pawh a ni lem awm lo e. Mahse, a lo ti ngei a nih chuan a dik thei khawp ang.
Hruaitute hian rilru fim tak, an chhia leh ţha hriatna dik tak an hman theih nana pawn lam miin chim chin tawk neih hi a ngaihna chin hi chu a awm khawp mai a. Chutih rual chuan mipui sukthlek an man loh leh hriat loh hi chuan an tan hian a pawi em em mai si ţhin a ni. Zoram buai chawhnu lam khan PC sorkar kha development thilah an tha khawp mai. Kum 40 dawn a liam leh hnuah pawh an hmalakna chuan a hre pha chin chu a lunglen ţhin. Mahse, khatih laia Zoram mipui duh leh mamawh ber chu hmasawnna emaw sum leh paia hausakna a ni lo. Thlamuang taka awm theihna hi a ni. Chumi atan chuan MNF leh India inbiak rem a, remna leh muanna neih hi a ni. Sum leh pai leh hmasawnna te hi chu boruak ralmuangah a la ngaihtuah theih dawn tho a. Remna leh muanna min zawrhtu Congress kha mipuiin kan awn tlat a ni. Kum 1984 khan Congress sorkar kan nei a, remna leh muanna min thlen a, a hnu lamah rorelna pawh kum 10 zet an chang zui a, mahse, remna leh muanna duhna boruak a reh deuh takah khan MNF khan kum 10 sorkarna an chang veleh a nih kha. Hmasawnna leh sorkar ţha duhnaa mipui kan tuihalna a nasa chho zel a, Congress chuan kum 10 ngawt sorkarna a chang leh a nih kha.
Amaherawh chu, kum 20 chuang mah ro lo rel tawh hnuah hi chuan mipui lam atangin thil thar beisei tura awm ta lo a ni ang a; tin, hruaitute pawhin mipui sukthlek an ngaichang reng peih ta bik lo te pawh a ni thei bawk a. MNF chuan sorkar an chang leh mek a, Congress erawh chu party ding thar tir ZPM hnungah a awm ta thung a ni. Tuna sorkar term kal mekah hian by-election ţum thum a awm tawh a, chungah chuan kum 20 chuang Mizorama sorkarna lo chang tawh party chu pathumna a la ni ta zar zar mai a. Mipui sukthlek hi an man ta lo nge ni tih an inenfiah chu a ngai ta hle mai. Party ruhrel lian leh nghet tak, member pawh ngah tak hi neutral-in an thlawp huna tho leh mai tur an nih laiin heti taka tun term a an hniam ta hi chuan chhan a nei ngeiin a rinawm.
Thil pakhat chiang deuh mai chu 2018 inthlan khan khan Congress party president Lal Thanhawla chu Champhai S leh Serchhip bialahte an ding ve ve a, a tla ve ve a ni. Hetah hian kum 20 chuang hnuah chuan mipui sukthlek a lo danglam nasa ta hle a, ani mipui sukthlek man thiam leh chumi avanga CM nihna pawh bansan ngam meuh pawhin a man thiam ta lo a ni tih chu a lang ta. A bikin Serchhip bial phei chu vawi 5 lai thlan tlin a lo ni tawhna, a bial ngawih ngawiha ngaih tur a ni a; mahse, by-election-ah pawh khan Congress candidate chu pathumna niin dahkham a chawi hial mai a nih kha. Party-in an la duha an la ngainat viau lai hian Zoram mipui hi chuan hruaitu thar an melh niin a ngaih theih. Kum 20 chuang zet CM nia lo awp tawhtu kaihhruai party kha an che chhe em em thei tlat.
Party hi a tul anga insiamrem thei a nih dan lantir nan moral responsibility lain Congress president kha bang ngam se chuan boruak a dang zawt ang a, an party leh mipui kar kak awm pawh a hnawhphui dan te a awm ngei ang. Strategy ngai ngai ni lo, a thar hman tur pawh a awm ang. Tin, upat tawh lamah politics hi mahni duh dana chhuah tawl mai theih a ni chiah lo a, entir nan – CM ni chunga politics chawlhsan te hi thil awm mai theite a ni lo a, chuvangin moral responsibility avanga ban te hi politics-ah chuan honourable exit a nih theih dan a awm ve a ni. Mahse, Tuirial bialah pathumna an nih leh hnuah pawh pu Lal Thanhawla chuan chutiang chu a ngaihtuah lemin a lang lo thung. An party chuan an zah ang a, an dahchhuak kher lo ang, mahse, party hi siamţhat a nih loh chuan sawp ral theih a ni thung. PC party te pawh hi ruh deuhin an insawp ral mek chu a nih hi maw…?
MNF pawh hi eng nge an ang? Party ruhrel lian tak a nih laiin Zoramthanga kaihhruaina hnuaiah ani uaithla lam tawhin a ngam zawngte chauh awm khawmna a nih chuan a sawp ral ve mai mai thei tho a ni. Pawl leh party te hian tha thar, hruaitu viak ţha vehvawh leh mipui sukthlek man zung zung thei hi an mamawh reng a, tuna, president te party bik emaw tihna kan neih reng chuan kan political party neih mekte hian rei tak an tlin hlawm lo thei tlat a ni.
Sawi leh lawk ila. Sipai lak chhantu kan mamawh laia min chhantu PC khan kan hmabak remna leh muanna aiin development an ngaipawimawh a, party chu a neitu bik awm emaw an ti a. A nghawng chu kan hria. Remna leh muanna kan duhna a sang em a, kum 10 zet chu khawdang hawi thei loin Congress kan ti tlut a, a hnuah development leh rorelna ţha kan han hawi chuan MNF nen an inchungnun chhawk ta rih chu a nih hi. Mipui sukthlek hmu thiam leh insiamrem thiam zawk zawk an la dingchang zui ngeiin a rinawm. A nih loh vek chuan ZPM emaw party dang pawh an la rawn lang ve tak tak thei.

Leave a Reply

Your email address will not be published. Required fields are marked *

error: Content is protected !!