Thisen sâng

HRISELNA HUANG:
Thisen sâng

• Dr. Lalrinsiami

Thisen sâng, BP (Blood Pressure) sang kan tih bawk hi a zirna lamah chuan hypertension tih a ni a, lungin thisen a kah-chhuah (Pump) nat lutuk vanga lo awm a ni.
He natna hi a tam sawt hle a, changkannain a ken tel zinga pakhat niin a lang.
BP pangngaia ngaih leh tlanglawn ber chu 120/80mm.Hg a ni a, kum a upat poh leh BP pawh hi a sang tawlh tawlh. 120/80mm.Hg chiah chiah hi chu an tam vak lo zawk a, kum 20 mi tan 140/ 90mm.Hg chin leh kum 50 mi tan 160/96mm.Hg thleng hi a pangngaia ngaih a ni. Mizote hi a tlangpuiin kan thisen a sang lo hle. BP pangngai tak (120/80) atanga 20-a sang emaw hniam emaw hi ngaih pawimawh thama ngaih a ni a, a chung lam aiin a hnuai lam hi ngaih pawimawh a ni zawk thin. Ent ir nan 140/100 (120+20/80+20) hi BP sang a nih laiin 100/60mm.Hg (120-2-/80-20) hi BP hniam a ni.
Mahse, a hranpa takin BP hniam natna hi a awm lo va, insawiselna neih loh a, an hna pangngai an thawh theih chuan a pawi lem lova ngaih a ni.
Tin, kan BP hi a inang lo thluah a, mi thenkhat tana pangngai kha thenkhat tan chuan a sangte pawh a ni thei. Chuvangin mahni BP theuh hriat a tha.

A hnuaia tarlante hian a tlangpuiin thisen sang an nei duh:

1. Kum upa (kum 45 chung lam),
2. Chi (Al) ei nasa lutuk te,
3. Meizu mi te,
4. Zu in mi te,
5. Lung natna nei mi te.
   Insawizawi, zah, helhhawlh, zauthau leh thlabarte hian thisen a sang ve thei a, mahse a sang rei lo. Chuvang chuan BP teh dawn reng rengin hahdam zana awm tur a ni.

A lan chhuah dan :
Thisen sang hi chi hrang hrangin a lang chhuak thei a, chungte chu :

1. Lu a hai fo a,
2. A chang leh lu a na a,
3. Nikhawhrelo te’n an tlu a,
4. An awmte a na vawt vawt a,
5. An hnarte a thi a,
6. Mit a vai a,
7. Thawkte a harsa a,
8. Lungphu hi a su dup dup a,
9. An chau ngawih ngawih a,
10. A then chu an tawng thei lova, an zeng a, thih thut mai pawh awl tak a ni.

An enkawl dan :

1. Mahnia in dawktawr chawp leh thiante ei ang hmawm ve mai mai hi a hlauhawmzia hriat a tha. Thisen sang hi damdawi hmang leh damdawi hmang lova enkawl theih dan a awm a. Damdawi chi tam tak a awm a, chungte chu daktawr thu ang a, a hunbi dik taka ei thlap thlap tur a ni. Entir nan: Nefedipine 5mg., 10mg. etc. a hmuama hmuam chite phei hi chu hman-hmawh ngaihna (Emergency)-ah an hmang nasa hle.
2. Ei-in : Zu in mi tan nghei nghal hmak tur a ni a, thau lutuk tan intihcher bawk tur a ni. Chi al ei uar loh hi a tha hle bawk. Chi (NaCl)-ah hian Sodium (Na) a tam hle a, chuvang chuan chawhmehah chi al loh tur a ni. Sodium telna reng r eng (Entirnan Ajinomoto) ei tam loh a tha.
3. Insawizawi (Exercise): Ni tin taima taka insawi-zawi thin tur a ni.
4. Mei zuk hauh loh bawk
   tur.
5. Endik turte (Investigation)
   i) Zun & Thisen
   ii) Awm X-ray
   iii) ECG

Mahnia damdawi lo inchawh ve ringawt hi a tha lo hle a, Doctor pan vat a him zawk inenkawl zel dan tur chu Investigation-a a lan danin a hril mai ang. Thisen sang neite hi dimdawih an ngai hle a, tihthlabar miah loh tur a ni.