Aizawl: Social Welfare Minister Dr K Beichhua’n nimin khan Siaha DC office building sak mek a tlawh.
Siaha DC office sakna atan hian sorkar term hmasaah NEDP atangin Rs. nuai 59,000 ruahman a ni a, sorkar tharah NEDP a tawp hnuah pawh tawpsan lohin kaltlangtir a ni. Kum 2018-a hna tan beisei a nih laiin harsatna hrang hrang avangin December, 2020 khan hna a tan a ni. Kum tharah zawh hman beisei a ni.
Dr K Beichhua hian Siaha Community Hall sak mek a tlawh bawk a, contractor ten an hnathawh hmasawnna te lo hrilhfiahin, minister chuan an hnathawh chin tha a tih thu a sawi. He hall sakna atan hian Ministry of Tribal Affairs atangin Rs. nuai 500 hmuh a ni a, kumin May thlaah hnathawh tan a ni.
Siaha khawpui chhunga Mara Weaving & Handloom Centre sakna tur hmun tlawh bawkin, Dr K Beichhua hian he centre sakna atan hian Northeastern Council atangin Rs. nuai 500 ruahman a ni a, contractor thlan fel tawh niin fur tlak hmaa hna tan thuai beisei a nih thu a sawi.
Social Welfare Minister hian ECM KTP Headquarters in Tisopi kawnga Siaha Youth Centre (SYC) an sak mek a tlawh bawk a, Prayer Hall pakhat sak nan cheng nuai thum tanpuina a hlan nghal bawk.
Dr. Beichhua hi Siaha DC Kesavan R, IAS, Siaha Additional DC Abraham Beirazi Khithie, PWD EE Er. Kaphmingliana, official te leh party miten an tawiawm a ni.