United Kingdom, Germany, Italy leh Australia te chu Omicron coronavirus variant hmuh chhuah thar kai awmna ram an nih belh leh ta a. He hri thar avang hian dodalna awmin World Health Organization (WHO) ngei pawhin tul lo ti mah se Africa chhim lam ram eng emaw zat atanga zin luh khap ram an pung zing.
United Nations hnuaia vantlang hriselna lam buaipuitu pawlin ‘variant ngaihven ngai’ tia a sawi, Omicron hi a hmaa mite aia hlauhawm zawk nia hriat a ni a. Mi thiamte chuan natna na tak a thlen thei bik em tihah erawh finfiahna tha tawk an la nei lo.
UK-ah chuan Inrinni khan Omicron kai hi mi pahnih, Africa chhim lam ram atanga lutteah kai an awm tih British Health Minister Sajid Javid chuan a sawi.
A hnuah Prime Minister Boris Johnson chuan heng ram atanga lutte chu endikna khauh zawk tih tur a nih thu a puang zui a. Vantlang chetvelna khuahkhirh aiin hmai tuamna hman leh chu an kal dan tur a nih rih thu a sawi bawk.
“UK-a lo lut tu pawh an lo thlen atanga ni hnih liamah PCR test an ti ang a, an kai lo tih a chian hma chuan anmahni inchikin an awm hrang tur a ni,” tiin Johnson chuan thuthar lakhawmtute hnenah a sawi.
Omicron kai nia rinhlelh nena awm dun hnaite chu ni 10 chhung anmahni inchikin an awm a ngai a, hmai tuam pawh khauh lehzualin an kalpi dawn tih a sawi bawk a. Inkaihhruaina thar an siam hi chawlhkar thum hnuah an ennawn tur thu Johnson chuan a sawi.
German state Bavaria-a an health ministry chuan mi pahnih kai an finfiah tawh thu a puang a. Anni hi November 24, Germany-in South Africa ram chu hri lenna tia an ram atanga luh a khap hmaa Munich tumhmun atanga lut an ni a. An inkhung hrang mek tih ministry chuan a sawi.
Italy-a National Health Institute chuan variant thar kai hi Mozambique atanga Milan-a lutah hmuh a ni tih a sawi.
Czech Republic-ah pawh tun hnaia Namibia-a zin chu he hri kai nia rinhlelh a nih thu an sawi a. Denmark health ministry chuan South Africa atanga haw mi pahnih chuan Omicron an kai an ring hle bawk.
Netherlands-a hriselna lam thuneitute pawhin South Africa atanga thlawhna pahniha thlawk haw zinga mi 61-in hri an kai a. Omicron a nih an ring hle tih an sawi.
Dutch thuneitute chuan Thawhtanni kal ta atanga South Africa, Botswana, Eswatini, Lesotho, Mozambique, Namibia leh Zimbabwe atanga an rama thlawk lut mi 5,000 vel chu a rang thei ang berin endik vek an tum tih an sawi bawk.
Australia-ah pawh Inrinnia Africa khawmualpui chhim lam ram atanga Sydney-a thlawk lut zinga mi pahnihin Omicron hi an kai tih hmuh chhuah a ni.
Anni hi an thlen hlima endiknaah an kai tih hmuh a ni a. An chuanpui mi 280-te pawh inkhung hrang tura tih nghal an ni.
Covid variant thar, Omicron avanga khawvel ram tam takten fimkhurna thil an kalpui mek laiin India sorkar pawh a awm mai mai bik lo va. State leh union territory tinte chu ram chhung lut tharte vil uluk tur te, endik tha tur te, kai an awm chuan lo mi dang kai lohna tura khuahkhirh tha tur leh invenna pek pawh kalpui chak sauh turin a ti.
Union Health Secretary Rajesh Bhushan chuan said state tinte lehkha thawnin Covid kai tamna lai bik pawh vil nasa turin a ti a. Tuna variant thar kai awm tawhnate chu sorkar laipui chuan ‘hlauhthawnawm’ huangah dahin India-a ram dang atanga lo lutte chu a hma zawng aia uluka lo dawngsawng turin a ti
South Africa rama hmuh chhuah hmasak ber hri hi Botswana, Hong Kong, South Africa bakah UK, Australia, Czech Republic, Italy, Germany, Isreal, Netherlands-ah a kai hmuh an ni tawh.
“Ram dang atanga rawn lut, a bik takin ‘hlauhthawnawm’ huanga dah atanga lo kalte chu uluk lehzuala lo dawnsawn a tul a. Tuna kalpui mek, lo lut tharte tlawh tawh ram hriat hmasak kalpui mek pawh mahni huam chhung theuhva khauh zawka lo chik a tul a. Heng ‘hlauhthawnawm’ huanga awm ram atanga lut zinga hri kai an awm chuan engnge an kai tih hre turin an sample chu INSACOG Labs-a endik tura tih tur a ni,” tiin health secretary hian a ziak.
Health ministry pawhin tun hnaia state thenkhata endik, a bikin RT-PCR test tlem chu ngaimawhin state-te chu tan la zual turin a ti a. “Endik a tam tawk loh avang hian ram chhunga hri inkai darh dan dik tak a hriat theih loh va. Endikna hmanrua tihchangtlun leh endik uar tura tih an ni,” tiin Bhushan hian a ziak.