BJP Mizoram Pradesh President Vanlalhmuaka’n Prime Minister Narendra Modi hnenah Mizoramah Prime Minister Scheme leh central scheme hrang hrangte a nihna tur anga hman a nih loh thin thu a hrilh.
Nimin khan Vanlalhmuaka hian Prime Minister hi Parliament House-a, a office-ah a kawm a, Central sorkarin sum a pek hmanga Mizorama chhunga hnathawhte endiktu Central Monitoring team tirh a tul thute Hmuaka hian Modi-a hnenah hian a thlen.
Central sorkar kaltlanga hnathawh mek – a bikin kawngpui siam mek te, rel kawng siam mek te, airport thawm that mek te chu a hun taka thawh zawh a nih theihna atana tan lakpui turin Hmuaka hian Modi-a hi a ngen a ni.
Agriculture leh horticulture lama Mizoramin hmasawnna a neih theihna tur te, Mizo thalaiten mahni kea eizawnna an neih theihna atana skill development institution changtlung zawk Mizoramah din a nih theih nan a hmalakna tur chungchangte an sawi dun.
BJP Mizoram Pradesh president chuan Mizoram chhunga autonomous district council pathumte chu Assam, Meghalaya leh Tripura a an level-puite anga an dinhmun siamsak turin PM Modi-a hi a ngen a, Myanmar ram buai avanga Mizoram raltlante chungchang te pawh a thlen bawk.
Hmuaka chuan Mizote leh Mizoramin harsatna an tawh hrang hrangte thlen bawkin, Mizoram chu India hmarchhak state-te zingah pawh hmasawnna kawnga hnufum ber an nih thute hrilhin, Mizoram chu ngaihsak bik ngai state a nih thu PM Modi-a hi a hrilh.
PM Modi-a chuan BJP Mizoram hruaitute thil thlen chu a ngaih pawimawh ngei tur thu sawiin, Mizoram chu India ram State a State pawimawh tak pakhat a nih thu te a lo hrilh.