Social & Environment Activist Vanramchhuangi’n khawchhak atanga Mizoram kaltlanga dan loa kuhva rah tawlh luh titawp tura hma la turin Mizoram chief minister leh prime minister hnenah memorundum a theh lut a, Thawhlehniah hemi chungchang ngaihtuahin Mizoram sorkar hotuten emergency meeting an nei dawn.
Myanmar atanga Mizoram kaltlanga dan loa kuhva rah tawlh luh dodaltu, Vanramchhuangi hian nimin khan Aizawl Press Club-ah chanchinbumite hnenah hma a lak dan a sawi a, dan loa kuhva tawlh luh chungchangah Chief Minister Zoramthanga leh Prime Minister Narendra Modi hnenah memorundum a theh luh thu leh nimin khan chief minister nen hian an inkawm thu a sawi.
Vanramchhuangi chuan, “Chief minister hnenah hian dan loa kuhva rah tawlhin Mizoramah nghawng tha lo a thlen dan hrang hrang ka thlen a, Pu Zorama hian Thawhlehniah emergency meeting a koh tur thu min lo hrilh a, sorkar hotute hmalakna hi kan ngaichang ang,” a ti.
Dan loa kuhva rah tawlh tuarna ber, Hachhek tlangdunga kuhva chingtute chu a tlawh tawh thu te, an ruahman dan chuan dan loa kuhva rah tawlh luh an duh lohzia lantir nan kawng zawh a, kuhva tawlh luttute kudam hal vek an tum thu a sawi a, hetihlai hian chief minister-in a thu thlente ngaihtuah tura emergency meeting a koh chu an ngaichang rih dawn tih a sawi.
Vanramchhuangi chuan dan loa kuhva rah tawlh luh hian nghawng tha lo tam tak a nei a, chung zinga a vei ber chu Hachhek tlangdunga kuhva chingtuten an thar chhuah an hralh thei lo a nih thu a sawi.
“Hachhek tlangdunga kuhva chingtute hian sorkar kum 2019-20 chhungin kuhva rah an hralhna atangin Rs. vaibelchhe 141 an la lut a, 2020-21-ah vaibelchhe 200 lei an inbeisei laiin khawchhak atanga kuhva rah tawlh avangin an hralh chhuak thei lo,” a ti.
Dan loa kuhva tawlh luh hian zirna, environment, real estate te a nghawng nasa tih a sawi a, “He sumdawnna hlawk uchhuak hian Champhai district chhungah in hmun leh ram a tihto phah hle a, Champhai mai ni lo, Mizoram khaw dangte pawh a nghawng chho zel,” a ti a, zirlaite pawhin lehkha zir aiin kuhva rah phura inhlawh an duh phah a, thil tha lo tak a nih thu a sawi.
Activist Vanramchhuangi chuan ram dang kuhva, Mizoram thar anga Country of Origin Certificate pek chu a dik lo a, tihtawpa dan ang taka revenue lak luhna zawn a tul tih a sawi a, Mizoram thar ni loa GST lak chu dawt a thil tihna a nih thute a sawi bawk.