Venhim hna thawktute chuan Chhattisgarh-Telangana inrina, Sukma district-ah Thawhlehni tuka hmun hniha inbeihna thlengah hmeichhia pahnih telin Maoist hel pawla mi panga an that tih police chuan an sawi.
Sukma district-ah hian Maoist hruaitu lawk hmeichhia, a lumanah pawh Rs. Nuai 5 chhiar chu Sukma, Dantewada leh Bastar-a District Reserve Guard (DRG) mite nena an inbeihnaah kah hlum a nih thu thuneituten an sawi.
Chhattisgarh leh Telangana ramri-ah tho, ramngaw hmun dangah inbeihna a thleng bawk.
Inspector General of Police (Bastar range) Sundarraj P chuan, “Telangana police-a Special anti-Naxal Greyhounds unit chuan Bijapur (Chhattisgarh) leh Mulugu (Telangana) district ramngawah Maoist hruaitu, Sudhakar leh a thuihhruai mi 40 vel an chetla tih an hriat avangin beihpui an thlak a ni,” tiin news agency PTI a hrilh.
Bijapur-a DRG leh Central Reserve Police Force (CRPF) mite chu a hmun lo dangchat turin an thawk chhuak tih a sawi bawk.
“Zing dar 7:00 velah Greyhounds team hi Semaldodi khua (Bijapur) leh Penugolu khua (Mulugu) bulah helho hi nangin an inkap zui ta a. A hnuah ruang pali hmuh a ni,” a ti.
Greyhounds unit-ah hian sipai pakhatin hliam a tuar a, thlawhna hmangin Warangal-ah phurh niin damdawi inah dah a nih thu IGP chuan a sawi.
Chhattisgarh khawpui atanga km 450 vela hla inbeihna chhehvelah hian hel dang an la awm em tiin zawn hna thawh mek zel a ni.
Sukma district-ah hian Maoist hmeichhia, ‘Munni’ tia an koh mai chu venhim hna thawktuten an that.
Superintendent of Police Sunil Sharma chuan Thawhlehni zingah khan Sukma, Dantewada leh Bastar-a DRG thawk chhuakten hel hi an that tih PTI a hrilh.
CPI (Maoist) Divisional Committee Member leh a hotu mi 35-40 vel ram hnuai, district pathum intawhna lai velah hian an awm tih thu an dawn chu bawhzuiin Thawhtanni zan atang khan kil thum atanga beih an ni tih a sawi.
Zing dar 6:45 velah silai hi puak tanin Maoist-ho leh a beitu pawl khat chu Tongpal police station huam chhunga Marjum hills-ah an inkap tih a sawi.
“Ruang pakhat chhar hi Munni a ni a, area committee member niin a luman pawh RsNuai chhiar a ni,” tiin Sharma chuan a sawi.
Venhim hna thawktu lamah hian thi leh hliam an awm ve lo tih a saiw bawk.