HMEICHHE HUANG
gynaecologist hmâa zep loh tur – 5
- Robert Zoliana
Thi neih ná ‘over’
John Hopkins Medicine tarlan danin, thi neih laia tunhma ang lo taka a na lutuk a nih chuan a rang thei ang bera hmeichhe lam thiam Gynaecologist hriattir tur a ni. Thi neih laia taksa na them thum, hnute thip leh lu na te hi thil pangngai tak ni mah se, thi neih hi a na lutuk a, ziaawm lam pan lova, a na tual tual a nih chuan endometriosis emaw uterine fibroids te a ni thei. Hemi chungchanga hi tlang takin doctor hrilh tur a ni a, tihziaawm theih-na tur te ngaihtuah theih a nih vangin ngawi renga tawrh tlawk tlawk tur a ni lo.
Sex hman laia na ‘over
Hei pawh hi ngaihthah chi a ni lo. Nupa nun hman laia nawm lohna leh na lutuka hriatna i neih chuan hmeichhe lam thiam doctor hrilh ngei ngei tur. Serh ro vangte’n nuam lo tihna leh hreh-awm tihna a thleng thin a, taksaa estrogen hniam vang te a ni thei. Nupa nun hmannaa position hrang hrang kalpui chung pawha hrehawm tihna te na lutuk ang chi te thleng-in zep tur a ni lo. Serh ro ah te a hnawih chi a awm a, nupa hnun hman hnu-a thisen chhuak te thlengin enkawl theih a nih avang-in ngawih bo pui loh tur.
Serh leh a vel
Tunhma ang lo taka serh leh a vela thil danglam deuh, bawk emaw rawng mak tak te thlengin a awm a nih chuan Gynaecologist pan vat a tha. STD natna emaw vun lam natna eng emaw tak a ni thei a, enkawl zui vat a nih loh chuan thil pawi dang a thleng thei tih hriat a tha. Fimkhur a ngai hle.
Nau neih lai/hnu ah
A bik takin, nau neih hnu hian naute lian lam deuh emaw hrin chhuah vanga serh-a insawiselna leh thler ang chi te pawh thil awm fo a ni a, thip deuh emaw nawm lohna a awm chuan mahni thu-a lo enkawl ve ngawt chi a ni lo. Zai that leh te a ngai thei a, chuvang chuan a rang thei ang bera i insawiselna hriattir vat hi thil tul tak a ni. Nangmahin tuar tlawk tlawh suh.