- Reuben Lalnunthara Hnamte
Ram kang hi a pawi hle: Kumtin deuh thaw hian khawvelah ram kang nasa tak a thleng thin a. Australia. Canada , USA etc. ah te ram kang nasa tak kan hre thin. Hei hian khawvel boruak a ti lumin, a tibawlhhlawh em em mai a. Nungcha leh ramsa ten an tuar bawk a, khawvel tan channa nasa tak a ni thin. Khunglai ramkang te chu Mizoram let engemaw zat daih emaw a kang a ni dawn a, a uihawm zia chu sawiin a siak lo a ni.
Mizoramah pawh lo hal hunlaiin ram tih kan palh kan uar hle. Lo hal tu te fimkhur viau mahse, chumi remchang hmanga kut hlei deuh emaw an lo awm thin a. Tih palh thil thu a tih kan palh a awm thin bawk. A pawimawh ber chu kan lo neih dan System te pawh hi kan thlak tan a ngai ta khawp mai. Hmanlai hun angah chuan mihring kan la tlemin, lo hal pawhin nghawng a nei vak lo a ni thei e. Tunlaiah chuan mihring kan pung zel a. Kan ram a lo changkang chho zel bawk a. Hei hi ngawt pawh ah pawh hian ram kan ti chereu nasa tawh tih nak a laiin, ram zau tak kan han tikang thin phei hi chu a uihawm takzet a ni.
Ramngaw te a lo chereu zel avang leh, kan lo changkang zel a; lirthei a lo pung zel a, Industry leh factory lian tak tak a lo ding zel bawk a. Hengte hian boruak chhia an siam nasa em em a, natna hri tha lo, tun hmaa kan hriat ngai loh thlengin kan vei ta mawlh mawlh mai zawng a ni. Khawvel lo lum zelin a ken tel hlauhawm tak chu, Tam leh hrileng hi a ni. Hri te hi a pung ta em em mai a, kan hriat ngailoh hri thar a lo chhuak zel a; hengte hi kan boruak bawlhhlawh tawh lutukin a ken tel te an ni a.
Kan boruak chhia te lo hipral thin tu Ramnngaw te a chereu zel chuan Hri tha lo tak tak hi tun ai a tam hi kan la hmabak zel dawn a ni. Pathianin khawvel a siam dan hmangah hian Mihringte leh nungcha, ramngaw te hi in chawm tawn tura a siam a ni a. Hei hi keini Christiante phei chuan kan vawn nun reng a pawimawh takzet a ni. Thing leh mau te hian tui thianghlim in tur min pe a, boruak thianghlim min pe bawk. Mihringin a hip tur boruak chhia te chu Thing leh mau te hian a lo hip ral zel a, hengte hi kan tan hriselna leh damreina kawnga kan mamawh em em a ni.
Kumtina kan lo neh dan te hi kan thlak tan a ngai ta hle mai. Sorkar pawh hian Agriculture lamah nasa takin hma la se la; kumtina lo hal lo va, lei let leh Terres te siam a buh leh thlai kanm thar chhuah te uar zawk a hmalak a hun ta hle mai. Ram changkang zawk leh China ramah te chuan Tlang a ramngaw te zuahin , phai lamah buh leh bal te an ching a, chu chuan tuihna tha tak siamin mihring tan leh thlai tan pawh a tha em em an. Keini chuan Tlang lampang a ramngaw te kan thiat zel a, kan tuihna te pawh a kangchat zel tawh a nih hi.
Tui paihna tha tak kan siam a ngai : Aizawl khawpui chhungah te hian tui luankawr tha a tam lo hle. Kan thlichhia paihna kan nei that loh avangin tuiin kua a hreuh a, leimin kan tuar reng mai a ni. Kan insak dan a bit si a. Hmanlai atangin khawpui plan mumal a awm loh avangin tawt deuhin kanin sawr bing a, in leng chang chang chauh ram kan nei a, heihian kan khawpui hi a ti tawtin, kan bawlhhlawh leh tuichhia paihna tha kan nei loh avangin kan boruak a bawlhlawh a, leimin hlauhawm tak kan hmabak reng mai a ni.
Kan khawpui plan dan hi chu siamthat rual a ni tawh lo. Mahse, a hnu zela mi tur hi sorkar hian uluk taka plan a siam loh a, mipui ten thu kan awih loh chuan tun aia chhiatna nasa zawk hi kan la hmabak khawp mai. Kan thlichhia paihna danah te kan fimkhur tawk loh avangin leimin mai bakah, kan luikawr te chu bawlhhlawhin a khat tawh a, hetiang zel a nih chuan kan hmabak chu a thim khawp mai.
Khawpui kan zauh a ngai: Kan khawpui ber hi kan tawt lutuk tawh a. Nitin lithei register thar sang tam an awm reng a. Two wheeler tan pawh a tlan ngaihna awm lo khawpin a lo tawt ta. Chuvangin kan khawpui zauh dan tur plan fel tak hi sorkarin a siam vat lova, hetiang tawt taka kanin ekchhenbeng zel chuan boruak thianghlim lo leh thli chhia nen, awm ngaihna a awmlo mai tih a hlauhawm tawh a ni.
India ram khawpuiah te pawh hian entirnan New Delhi etc. te a awm ang hian New Aizawl te pawh hi a awm a hun tawh a ni. Plan fel tak siam a, tun anga tawt lutuk lo leh felfai zawka khawsakna tur ruahman a hun tawh hle mai. Mihring pun chak dan leh changkan chak dan hi a sang chho tulh tulh a, hmasawnna hi kan hriat hma hian a thleng chho dawrh mai emaw tih mai tur a ni tawh a ni.
Kan Khawpui tawt lutuk avanga boruak bawlhhlawh thin zia te pawh kan hria a. Tunah pawh nipui an ni ang a, kan boruak bawlhhlawh chu a nasa leh dawn a ni. New Aizawl kan siam thei a nih chuan chu chuan kan tawt lutuk min ti ziaawmin boruak thianghlim lo lutuk pawh a kiam dawrh theihin ka ring a. Khawvel than chhoh dan hi a ni telin a sang tulh tulh a. Information technology ah hmasawnna a zuang chho zung zung mai bawk si a. A ram neitute hian inbuatsaihna tha zawk kan neih a pawimawh hle mai.
Mizorama chengte hi a then chu mi changkang tak tak an awm tawh laiin, a tamber hian kan hmalam hun hi kan thlir thui lo em em mai a. Kan inrin hmain khawvel changkanna leh mihring punna hian min tibuai ta a ni. Ram nuam siam tur chuan a mipuite hi kan pawimawh hle. Sorkar dan te hi zahthiamin pawisa ila; inhmelhriatna leh inchhungkhatna aiin Dan te hi dah lal zawk ila; ram nuam tak chu kan la nei ngei ang.
Kan ram hi a lo nawm a, boruak thianghlim leh khawtlang felfai zawk kan neih chuan a nuam ti tur chu keimahni tho kan ni. Pathianin Zofate hi Ram nuam tak, sik leh sa nuam tak min pe a, chumi enkawla duat tur chu keimahni kan ni. A tichereu leh a tichhe zawnga kan ram hi enkawl lovin ram nuam tak keimahni leh midang min rawn tlawhtute tan pawh a khawsak nawmna tur khawp i siam zawk teh ang u.