Khawvawh a zual; fimkhur zual a tul
Mizoramah khawvawt a zual a, Aizawlah pawh boruak a vawt chho hle bawk. Mi tam takin intihlum nan electric hmang heater kan hmang nasa a, kan fimkhur zual erawh a ngai thin khawp mai. Kangmei chhuak thei laka kan fimkhur a, electric tichhe lo zawnga department thuchhuah thlenga kan ngaihpawimawh pawh a tul awm e.
Khawvawh a zual zel avang hian intihlum kan mamawhna a nasa a, State Meteorological Centre, Directorate of Science & Technology chhinchhiah dan phei chuan, Aizawl bikah kumina khaw vawh lai ber chu January 29, zing dar 5:22 vel kha niin, khaw vawh dan tehnaah 8oC a ni. Hei hi ni khata khaw vawh lai ber (daily minimum temperature) ni bawkin, January 2022 chhunga ni tina khaw vawh lai ber zel chawhrualin 13.1oC a ni bawk.
Hetiang hi khaw vawh dan a ni a, January thla phei kha chu vawh chho ve tak a ni bawk. Electric hmanga intihlumna kan hmang nasa a, meihawl chhem a inailum nasa kan tam hle bawk. Kangmei chhuak thei laka kan fimkhur zual a tul a, khawvawh vanga kan tawrhna thleng thei hrang hrang pawh kan hriat a, kan sulhnu enfel hram hram zel a pawimawh hle.
Hetih lai hian power supply siamchhuah lamah erawh kan intodelh lo hle tih hriat a tha a, khawvawh vanglai pawh hian hmun thenkhatah chuan power inpekchhawkna a nasat phah hle bawk. Kan tawrhna hi a la nasa tawk lo em a, mipui kan phun lo mai mai nite pawhin a lang. Sorkar awm leh zel turte pawhin hmathlir thui tak an neih a tul a, khawvawt leh khawlumte kan la tuar chho fo ang, chutiang huna kan buai lohna tura inzirtirna leh invenna hrang hrang hi kan tihchhuah chamchi a hun chho hle. Kan zavaia himna tur a ni si a.