India ramchhunga smartphone market-in nikum 2021 khan a hlawkna $billion 38 (Rs vaibelchhe 2,83,666) lawih a tel ta a, kum hmasa nena a punna 27 tlingin, rampawn atanga thawnluh unit mtd.169 an hlawkpui.
Heti zata tam thawnluh hi India-in a la tawng ngai lova, chutih rualin hmanraw thenkhat khaih lakna vangin December thla khan thawnluh zat tlemin a tlahniam thung tih mai loh chu kumtluanin a lut zut zut.
Xiaomi
Rinlawk ang ngeiin Xiaomi chu nikum khan smartphone brand number one a ni a, share zaa 24% changpha hian premium segment (Rs 30,000) chung lam hoah a hralh hnem ber. A hlawkna revenue 258% a tel pha. Hetah hian M 11 series te an langsar.
Samsung
Samsung hi pahnihnaah awmin, hmasawn taka a lan laiin, nikum lam khan a tlahniam. Heti chung hian market share 18% a la hauhpha tho. A kutchhuak 5G smartphone te hi phehthlak an har fu mai a, Rs 20,000-Rs 45,000 inkar phone te hi tawh an khirh zek. Mahse, supply chain lamah a khaihlak nasat vang leh Note series bik a awm mumal loh a tuar hle. Heti chung hian a thleh (fold) chi bikah number one a ni pha tho.
Realme
Hei le, pathumna ah Realme a lang. Smartphone thang duang leh ngaihven hlawh sawi a nih chuan Realme a lo lang nghal lo thei lo. Nikuma a hmasawnna 20% a tling pha hial. Kum tawp lam a lo thlen meuh chuan pahnihna a ni teuh hle a, market share 17% a ni pha. Narzo leh C Series an chetthatpui miah miah hle.
Vivo & Oppo
Vivo leh Oppo te chu palina leh pangana an ni a, Vivo hi 5G smartphone brand bikah nikum khan ‘ber’ nihna hauhin hmasawnna 19% a ni pha. Oppo pawhin kum hmasa aiin 6% in hma a sawn bawk. An tha dun hle.
Hetih lai hian brand dang leh lar chho mek- iTel, Infinix leh Tecno te pawhin lawmna tur tam tak an nei a, an mahni enawltu leh neitu ni bawk Transsion Holdings tan phurna nasa tak an thlen ngei dawn tih a chiang. Beiseina sang tak nei, Nokia erawh a lawr tak tak thei lo.