Khawzawl district chhunga Myanmar raltlanten Mizoram sorkar atangin tanpuina Rs 39,719 an dawng tawh.
Khawzawl District Level Committee on Myanmar Refugees chu an chairman, Bawrhsap C.C. Lalchhuangkima hoin nimin khan DC Conference Hall-ah a vawi khatna atan an thukhawm a, he hunah hian an district chhunga raltlante tanpui nan state sorkar atanga sum an dawn Rs 39,719 chu sem chhuah vek a nih tawh thu tar lan a ni.
Thutkhawma an tar lan danin, tun dinhmunah district chhunga khaw panga – Khawzawl, Chhawrtui, Chawngtlai, Tualpui leh Tlangmawi-ah te raltlan 54 an awm mek a, raltlante hi an chhungte bel leh mahnia intungnung theiin an awm vek.
He thutkhawmah hian raltlanten Covid-19 hri danna an lak ngei theih nan ruahmanna siam nise tih a ni a, raltlante a hmunah tlawha Medical Officer-te nen, inrawn chunga ruahmanna siam turin Additional DC Lalrohlua leh SDO (Sadar) James Lalnithanga, Nodal Officer ni bawkte an ruat a ni.