Manipur assembly inthlan thawh khatna atana hming pek luh theih hun chu Thawhlehni atang khan hawn a ni ta.
Inthlan vote thlak nan ni 25 chauh a awm tawh tihah Joint Chief Electoral Officer Ramananda Nongmeikapam chuan district pangaa assembly bial 38-a inthlan tura hming pek theih hun hawn a ni tih hi hriattirna a chhuah.
District panga — Imphal East, Imphal West, Bishnupur, Churachandpur leh Kangpokpi te hi Manipur laili leh chhim lama mite an ni hlawm.
Inthlah thawh khatna chuh tumte hian Thawhlehni atangin an hming an pe tan thei a, February 8 thleng hun hawn niin a tukah endik an ni ang.
February 11 thleng hming pe lut zingah inhnukdawk leh duh an awm chuan hun hawn a ni bawk.
March 3-a assembly bial 22-a inthlanna tur hriattirna pawh February 4-ah tihchhuah a ni ang.
Joint CEO chuan Covid-19 leng mek avangin chuh tuma inpe duhte chuan Election Commission-in Suvidha portal a siam hmangin online-in an hming an pe thei tih a sawi a, mahnia thehluh kher duhte pawhin a theih a; mahse, mi pahnih chauh tawiawmtu neih a phal.
Candidate-te hian online-a hming an pek theih bakah hian security money an tih chu online hmang thovin an pe thei dawn bawk a, Returning Officer hnenah an thehlut thei bawk.
Candidate-te hian inkhawm koh leh in tina campaign pawh online hmang thovin an dil thei bawk.
Manipur inthlan lo awm turah hian BJP kaihhruai sorkara tel ve, Naga People’s Front (NPF) chuan bial 10-ah an chuh ve dawn tih Thawhlehni khan an puang.
Kohima, Nagaland-a an party rorelna sang, working committee thukhawm chuan he thutlukna hi an siam a, General Secretary Achumbemo Kikon chuan a puang a ni.
Kikon-a chuan party chuan chuhtu tur hming 40 theh chhuah atangin mi 10 an thlang chhuak tih a sawi.
NPF hian heng inthlan chuh tur an thlan chhuahte hi Scheduled Tribe (ST) tana chuh theihna bial, an tana hauhva ding tur an ni tih Kikon-a chuan a sawi bawk.