- David Zochhuanmawia (Vida Hrahsel Saza)
Engti ang zâwngin nge bul ka \an ang tih pawh ka hrethiam law… mahse, ka rilruah a lian ve tlat lawi a!
Mahni inhmuh \hat hi chu tu tan pawh hian a lo awl êm êm a, fel ber nia inngaihna te, \ha ber nia inhriatna te, a bulpui berah chuan mihring te hi chapona hian min va luahkhat hma \hin tak êm! A ziaktupa ngei pawh hi ka bang bik lo ang, inzir zel tùr mihring erawh kan ni thung e. Mahse, Bible-a kan hmuh, insumtheihna te, dawhtheihna te hi thlarau rah a ni, an ti \hin a. Mi fate anga inti rau ve chiam lo tan pawh, engemaw chenah a lo rau ve theih dawn viauin a lang. Insumtheihna leh dawhtheihna ngah tak, mihring fel tak tak an la \hahnem êm mai!
Mi mita hmawlh te tak tê chu –
‘Pathian thu mi’ ni lovin, ‘Pa fiamthu mi,’ mi \henkhat sawi \hin danin, “Kan zu in chauh hi insawi insawi a, kan pum tana \ha tùra kan bawnghnute in te hi in sawi ve leh duh \hin si lo a,” a tih ang deuh kha kan niin a hriat. Kan thil tih \hat in sawi len sak a, in fak aiin, kan chin \ha lo tlemte in sawi len sak kan ching a, mi mita hmawlh te tak te awm hi kan hmu thei êm êm a, mahni lam kan indah \ha ta \hin a ni. Khawvelah hian harsatna tawk lo hringfa awm bikin ka ring lo a. Tin, tlin lohna nei vek, famkim lo inti rual awmkhawm kan ni, tih hi kan chian nawn a ngaiin a lang. Chapo tak chunga tling lo intite ang ni si lovin.
Mahni mita khanchhuk lian deuh chu –
Mi mita hmawlh te awm hmu thei deuhte hian mahni mita khanchhuk awm hi an hmuh kân fo niin a lang a. Midang \hat lohna sawi tùr hre deuh, midang \hat lohna leh tlin lohna hmu thei deuhte hi an \hat lohna lai an sawi vein, sawisel haw êm êm mihring an ni duh tlangpui lehnghal a. Mi hlauhawm tak an ni a, an bula awm tam loh a him viau bawk a ni. Chuti ang mihring chuan lam\ang an siam thiam êm êm a, an lam\ang anga an ngaihte kuta rul kaw zen lah an thiam duh fû lehnghal. Pawl (N.G.O) hruaitu pawh la ni ngai lo an ni duh fû a, an ni ve tawh a nih pawhin, mi ruala ke pen thiam lo, mi zai ngaia kal thiam lo an ni duh tlangpui. Mihring hian ze hrang hrang kan nei \heuh a, kan mithiam Psychologist te’n keini aiin ziah/sawi tùr an hre hnem zawk ang chu!
Hmânlai chuan –
Hmanlai mizo pipute dànah mizote hi \hat leh \hat in lâwm tawn \hin, a thlum a al ei za \hin hnam kan ni a. Chumi chawi vul ai chuan, ‘ka \henawm pa hian hralh thei lo se, keiin hralh char char ila,’ tih rilru kan pu nasa tawh hlein a hriat bawk. Pathian \ih phei chu sawi loh, rilru \ha\ inchhuah tawn a\anga kan zir a, bul kan \an thar leh a ngai takzet a ni. Kan hmel\ha emaw, kan hmelchhia emaw, rilru hi han \ha êm êm phawt se a pawimawh ber mai e. Tin, in\henawm khaw venna thilah pawh, kan chan phâk hauh loh tùr hmel\ha deuh, hnai taka hmuh fo ai chuan, mi rilru \ha deuh, mi fel tak \henawm \ha neih a chakawm daih zawk àwm e.
A Tlipna –
Politics thilah pawh thil ni thei lo lutuk hmanga inpuh a, rilru chhe deuh put te hi sim ngam ila. A dik chu dik; dik lo chu dik lo tiin, huai takin kal ngam ila. Thil pawimawh ber pakhat chu, “Pathian \ih leh rilru \ha tak hmanga Politics kan khelh hi a hun tawh takzet,” a ni. Tin, pawl (N.G.O) ah kan inhmang a, kan tel ve a nih pawhin, engamah hmaa insawisel bâwih bâwih lovin, Pâwl hmasawn dan tur kan ngaihtuah zawk hi a \ulin a hriat a. Kan insawisel bâwih bâwih hian thawhpuite ah ser nung a tuh mai mai a, hmasawn aiin tlakchhiat a awl zawk niin a hriat. Heti zawk hian ni se ti emawa, \awngkam \ha taka inhrilh kan chin \han a hun leh tawh takzet a ni.
“Mi in i chunga an tiha i duh tùr ang bawkin, mi chungah pawh ti ve rawh,” tih thu Bible-a kan hmuh angin, he thu hian kan rilru hi luahkhat sela, mizo thufingin, “\henawmte do ai chuan khaw sarih do a thlanawm zawk,” an lo tihte hi ngaihtuah thar leh teh ang u. Ramin hma a sawn dawn chuan mahnia bul\an zel a ngai a ni, tih hi kan hlamchhiah rei ta deuh e.