Serchhip IOC Venga V&Sons dawr atanga rawng leituin a hawnna lamah rawng bur puakin a mit (eye) pakhat a tihchhiat avang rawng zawrhna dawr neitute chu Rs 4,30,000 chawi turin nimin khan Consumer Court-in thutlukna a siam.
November 5, 2021-a New Serchhip Venglaia cheng, H Lalremruati’n Consumer Court tia hriat thin, Serchhip District Commission-a consumer complaint a theh luh atanga a lan danin, V&Sons atanga an rawng bur lei, Berger 200ml bur a hawnna lamah rawn puakin H Lalhmingthanga a mit pakhat phuh a, khua a hmuh theih loh phah a ni.
Hemi avang hian Berger Paint Agent V&Sons te chu court kaltlangin an inenkawlna senso Rs. nuai thum leh zangnadawmna Rs. nuai hnih, a vaiin cheng nuai nga chawi tura phutin consumer court-ah a zualko a. He thubuai hi commission chuan thu tlingah ngaiin Consumer Court case 11 of 2021 a ziak lut a ni.
Biak hmuh theih kaltlangin court hearing neih thin niin, thubuai thehluttu leh dawr neitute chu insawi fiahna hunte pek an nih bakah, doctor te thurawn lak a ni a. H Lalhmingthanga mit chu zaiin awmzia a awm loh thu leh a del hlen a rin thu doctor-in court-ah a thlen hnuah, a lehlam ve vete chu insawi fiahna hun pek leh an ni a. Hemi hnu nimin, khan court chuan thutlukna a siam ta a ni.
Court thutlukna ang chuan V&Sons-te hian vanduaina tawktu H. Lalhmingthanga hnenah damdawi inenkawlna senso atan Rs 50,000, Serchhip leh Aizawl inkar zinna senso atan Rs 10,000 an pe ang a. H.Lalhmingthanga mit del avanga a sum lakluh tur hloh chhawmdawlna atan Rs 2,50,000, rilru hah leh tawrh man Rs 20,000, a mit del tak avanga a nun hlimna leh a dam chhung hun tha a hloh avanga zangnadawmna atan Rs 1,00,000; a vaiin Rs 4,30,000 pe turin a ti a ni.
Pawisa chawi turte hian vanduaina tawkte hnenah an sum chawi tur hi Court thutlukna tihchhuah ni atanga chhiara ni 60 chhungin an pe tur a ni a, an pe lo anih chuan an sum chawi tur hi kum khata zaa 12-a pung tura tih nia thudawn a ni.