Prime Minister Narendra Modi-a sorkar chuan infrastructure lamah pawisa tam zawk hman a tum a, sumdawng tenau zawkte hnenah sum tam zawk puktir a tum a. Hei hian Asia-a economy lian ber pathumna, Covid-19-in na taka a nuai hi a chawi chhuak zo dawn em tih zawhna a awm mek.
Thawhlehni khan Finance Minister Nirmala Sitharaman chuan parliament-ah union budget 2022-23 a pharh a. Covd-19-in a sawp avanga mi mangan lai, mi tam takin hna an hloh lai, thil man a san lai leh Omicron-in a nuai mek laia pharh a ni.
Sorkar hi mi tam takin ei bar dinhmunin ngai a awh leh theihna tur leh tam tak an mangan laiin hma a la tha tawk lo tia sawi a hlawh hle.
Sitharaman-i chuan ramin sum a thawh chhuah a tlem mek laiin a tihkanna turin sum tam zawk hman a ni dawn tih a sawi a, sorkarin sum a thawh chhuah leh a sen ral a tam dawn tih a sawi.
India-in kum khat chhunga a sum hman leh lak luhna tur a ruahman hi economist tam tak chuan an hlauhthawnpui a. Nasa taka inhman chu a pung (interest) lam atanga nawrtu an pun phah an hlau.
Sorkarin sum hman tur a ruahman hi nikuma ruahman aiin 35.4% zetin a sang a. Sum hmanna tur lian zingah expressway, highway km 25,000, cargo terminal thar 100 leh solar panel siamtute hnena man tlawma thil tam zawk leitirna turte a tel.
Income tax lak luh zat bi tihdanglamna tur a awm lo va, stock market lam chuan mi hausate hnen atanga chhiah lak thar tur a awm lo chu lawmawm an ti a, nasa zawkin sum senna lamah inhman theih a ni dawn niin an ngai.
Economist Shubhada Rao chuan mi mal sumdawngte tana sum dah chu hripui a len hma ang zat tho a la nih avangin ‘beisei lawk aiin a tlem’ tiin a sawi a. Heng sumdawngte hi Indian economy 55% zet innghahna a ni.
Hna nei lote hna siamsakna tur mumal tak engmah ruahman a awm lo bawk a. Hei hi tun hnai maiah pawh Bihar-a tharum thawhna a thlen chhan pakhat a ni.
Thngtlang mite kum khata ni 100 an inhlawhna, MNREGS-a sum dah pawh a hma kum aia tihtlem a ni.
“Beisei len ber, khawpuia mite thingtlanga mite ang bawka inhlawhna tur an neih theihna chu dah a awm lo va, hei hian he budget hi a tihniam,” tiin Centre for Monitoring the Indian Economy-a Mahesh Vyas chuan a sawi.
Sitharaman-i budget pharhah hian ei leh in leh thlai damdawi lama lo neitute puihna tur sum tihpun a ni lo va. Economist-te chuan sorkar hian a thlawna ei tur a sem an lo beisei laiin hetiang a awm lo.
Budget tharah hian cryptocurrency hmanga sumdawnna lama inhmanna tur dah a ni a, he sumdawnna hi India-ah dan anga phal a la ni lo va, budget-a dah a nih tak avang hian phal thuai a nih rin a ni.
Sitharaman-i chuan central bank, Reserve Bank of India chuan kuminah hian blockchain technology hmangin ‘digital rupee’ a tichhuak dawn tih a sawi a, hei hi ram lian zinga a tihmasa pawl a ni dawn tihna a ni.
India hian hmuh mai thei loh thil (virtual digital asset) atangin chhiah (income tax) a lak chu 30%-in a pung dawn dawn tih a sawi bawk.
“Central bank-in digital currency a ti tur hian digital economy lamah nasa takin ram a chawi kang dawn a. Currency rintlem leh a man tlawm zawk enkawlna kawng a tiawlsam dawn a ni,” a ti.
Prime Minister Narendra Modi chuan union budget pharh tak chu ‘mipuite thian leh hmasawnna tur’ tiin a sawi a. Hmasawnna ruhrel dinna tur, investment, thanna leh hna tam zawk siamna tur niin a sawi.
“Budget hi kum 100 chhunga chhiatna lian (Covid-19) atanga hmasawn tura inrintawkna thar siamtu a ni a. He budget hian economy a tihchak dawn bakah mi vantlang tan remchang tam tak a siam dawn,” a ti.
“Budget-in a ken tel pawimawh tak chu mi retheite tana hamthatna awm hi a ni a. Mi rethei tu pawhin pucca house, tui herh haw tur, inthiarna, gas leh a dang an nei vek dawn a. Internet connectivity pawh ang khat vekin an dawng ang,” a ti.
Prime minister mi vantlangte harsatna chu rorel lai, BJP-in a chin felsak dawn tih a sawi.
Modi chuan ram chhunga a vawi khat nan Parvatmala scheme chu Himachal, Uttarakhand, Jammu & Kashmir leh hmarchhakah bul tan a ni dawn tih a sawi a. “He ruahmanna hian tlangramah tun lai inkalpawhna awmsam zawk a din ang,” a ti.
Union Home Minister Amit Shah pawhin budget chu ‘hmathlir thui tak nei’ tia fakin India chu Prime Minister Modi kaihhruaihna hnuaiah khawvel economy hmahruaituah a siam dawn niin a sawi.
Eptute erawh chuan nasa takin an sawisel a, mi vantlang leh lo neitute tan engmah a ni lo niin an sawi.
“Budget hi mi hausa tan a ni a, mi retheite tan engmah a awm lo. Arjuna leh Dronacharya tan budget a ni a, Eklavya tan a ni ve lo,” tiin Congress hruaitu, Rajya Sabha-a Opposition Leader Mallikarjun Kharge chuan Mahabharata thawnthu behchhanin a sawi a. “Cryptocurrency-te an tar lang a, hemi-ah hian dan kan nei tawh em ni? A hmain kan lo sawiho tawh em? He budget hi an thiante tana an ruahman a ni,” a ti.
Congress president hlui, Rahul Gandhi pawhin ‘zero sum budget’ tiin a sawi a. “Hlawh bi nei tan, middle class, rethei leh hnufual, lo neitu, thalai leh sumdawng tenau tan awmzia a awm lo,” tiin Twitter-ah a tar lang.
Janata Dal (United) hruaitu, Upendra Kushwaha pawhin budget pharh taah chuan state rethei, Bihar tan sawtna tur a awm lo niin a sawi bawk a. “Union Budget hi state intodelh tan chuan a duhawm a; mahse, rethei tan chuan engmah lo a ni mai. Finance Minister Pi Sitharaman-i hian Bihari-te chu hlamchhiahin kan duhnate engah mah a ngai lo,” tiin micro-blogging platform, Koo-ah a tar lang.
Union Finance Minister Nirmala Sitharaman-i’n Thawhlehnia Union Budget 2022 a pharh tak hi a zawna Lok Sabha rorel inkhawma vawi li a pharhna a ni ta.
Budget pharha a thu sawi bul tan nan hian Covid-19 hripui leng avanga hriselna dinhmun hniam ta leh ei leh bar zawnna kawnga harsatna nei ta zawng zawngte a tawrhpui thu a sawi.
A budget pharh tak chu kum 25 lo awm leh tura India ei bar dinhmun (economy)-in a thlen theih tur a panna kawngpui a nih thu a sawi bawk.
India budget pum pui hi US $ tluklehdingawn 529.7 zet a ni a, Sitharaman-i chuan kawngpui tha neihna tur leh mi tinin chenna in tha an neih theihna turin sum tam zawk dah a nih thu a sawi a. Chu chu hripuiin ei bar dinhmun a tihchhiat mekna lak atanga thawh chhuah lehna tura kawng pawimawh a nih thu a sawi bawk.
Thawhtannia Economic Survey 2022 a pharhah Sitharaman-i chuan kum lo awm tur chhung hian ram sum thawh chhuah, GDP chu 8% aanga 8.5% thlenga thang tura beisei a ni tih a sawi a. Kum kal mekah 9.2% beisei niin a hma kumah erawh 6.6% chauh a ni thung.