Aizawl: Tun hnaia Mizoram sorkarin ram puma kawlphetha chhit man tihsan leh a tum chu Congress party thalai chuan dodal an tum thu an sawi.
MPYCC president Dr Lalmalsawma hoin nimin khan Mizoram sorkar atanga Joint Electricity Regulatory Commission (JERC)-in kawlphetha chhit man tihsana tur rawtna a dawn chungchangah, dodalna (objections) siam ngei an tum avangin Er H Thanthianga, Asst. Chief Engineer, JERC, chu Khatlaa a pisaah an kawm.
An inkawmaah hian Dr Lalmalsawma hian Mizoram sorkarin kum kal ta, 2021 khan Mizoram sorkarin kawlphetha chhit man tihsanna hi zaa 41.92 laia tihsan a rawtna chu nasa taka beng hniam a ni chungin zaa 20.68 laia sangin tihpun a lo ni tawh tih a sawi.
Tunah kum chanve chauh a vei hnuin, mipui harsat lai bera zaa 20 laia tihsan rawtna January 2022-a JERC hnena a thehlut leh ta hi vanduaithlak a tih tur thu leh an dodal tur thu a sawi a. Mipui thlawpna an ngen nghal bawk.
Asst. Chief Engineer JERC Er. H. Thanthianga pawhin Mizoram sorkar atangin kawlphetha tihsan rawtna an dawn angin, dodalna (objections) neite chuan February ni 20, 2022 thleng dodalna lehkha hi thehluh theih a nih thu chanchinbuah thuchhuah siamin an tihchhuak tawh tih Congress thalaite hi a hrilh a. Congress thalaiin ‘objections’ an ‘submit’ turah ‘hearing’ neih hunah koh an nih tur thu a lo hrilh bawk.
MPYCC President Dr. Lalmalsawma chuan, “Tun hun hi sorkarin rawtna a siam dodalna thehluh theih hun lai a ni,” tiin, pawl leh mi thahnem ngai tak takte kawlphetha chhit man tihsan hi dodala ‘objections’ hi JERC hnena thehlut turin a sawm nghal.
“Tun Covid-19 harsatna mipuiin na taka kan tawh lai hian, Mizoram sorkar hian kawlphetha chhit man tihsan a rawtna hi hnukkir leh rawh se. Nikum lama kawlphetha chhit man zaa 20.68 laia tihsan kha a sang thawkhat viau tawh a ni,” Congress thalai president hian a ti.
“Congress sorkar lai khan kawlphetha tariff hi uchuak taka tihsan a awm ngai lo tluk a ni a, kawlphetha chhit man an tih sanna kha; kum 2015-16 khan 2%, 2016-2017-ah 4.02%, kum 2017-18-ah 3.60%, kum 2018-19-ah 5.90% te chauh a ni. India ram ei leh bara thil man sang ‘inflation’ mil vel chauha kawlphetha chhit man kha tihpun chauh niin a lang,” a ti bawk.
Nimin vek khan Congress thalai hian World Bank Road Aizawl atanga Lunglei panna kawnga Hualngohmuna building pakhat, kawngpui a hnaih lutuk avanga harsatna thlen thintu chu a hmunah a en nghal bawkin, Covid-19 hripui lengah Aizawl atanga ZMC, Falkawn panna inkara damlo na tak tak phur thinten harsatna an tawh fona; Hualngohmuna building avang hian kawng a zimin, lirthei inpelh mumal theih a ni tawh lo chu Congress thalai hian pawi an tih thu an sawi a ni.