India-a zaithiam ngaihnat hawh ber tihngam Lata Mangeshkar chu nimin khan Breach Candy Hospital, Mumbai-ah kum 92 mi niin a thi.
A hun tawp lam
Bollywood hla sangthum chuang sa tawh hi Covid-19 leh pneumonia vangin Damdawi In-ah hun eng emaw chen enkawl a ni a, doctor te chuan a hun tawp-ah hian a taksa peng hrang hrangte’n hna an thawk tawh lo niin, an sawi.
Kum 80 chuangzet zaithiam hlawhtling leh dah chungnun niin, a hun tam zawk a hmang a, a hla sak zingah hian tawng chi hrang 36 zet a awm nghe nghe.
A bik takin, Bollywood tan channa nasa tak a tling a, national icon a nihna turah Hindi film industry pawh hian pawimawhna nasa tak neiin, filmstar te leh director te’n an film ah te a hlasak telh ngei a nih theih nan theihtawp an chhuah vek, a tih ngam bawk.
India sorkar chuan nimin Pathianni atanga chhiarin, ni hnih chhung sunna hun a puang a, rampumah hnam puanzar a ngul chanve-ah zar a ni ang a, state chawi-mawina famkim nen Mumbai-ah thla liam a ni ang.
Thlahna thu
President Ram Nath Kovin chuan a boral thu chuan khawvelpuma mi mi maktaduai tam takte rualin a thinlung a tikehsawm a ni, a ti a. Prime Minister Narendra Modi pawhin Mangeshkar thihna hian ram tan hnawh khah theih tawh loh hmunruak zau tak a hnutchhiah, a ti ve bawk.