Covid-19 leng karah taxation department-in sorkar kum 2021-22 atana an target an khum tawh a, an target hi Rs. vaibelchhe 60 vela an khum theih an inbeisei a. Kuhvaa sumdawngten GST an chhun avangin chhiah an hmuhah awmzia a nei hran lo tih taxation department-in an sawi.
The Zozam Times zawhna chhangin Taxation Commissioner Kailiana Ralte chuan an target, Rs vaibelchhe 717 chu Rs vaibelchhe 16-in an khum tawh tih a sawi a, chhiah chi hrang hrang atanga an hmuh tawh chu Rs vaibelchhe 733 a nih thu a sawi.
An target chu Rs vaibelchhe 60 vela an khum theih an beisei thu sawiin, “February thla deuh chauh hi a awm tawh chungin chhiah hi kan la hmuh that kan ring a, sorkar kum a ral hunah engzat chiahin nge kan target hi kan khum theih dawn la hriat loh mah se vaibelchhe 60 vela kan khum theih ngei kan beisei,” a ti.
Chhiah an khawn that thu leh chumi avanga an target tihsan a nih tawh hnua khum leh theih an nih thu sawiin, sorkar kum bul tan tira an target hmasa chu Rs vaibelchhe 650 a nih thu leh an target chu Rs. nuai 67-a tihsansakin, kum 2021-22 chhunga an target chu Rs. vaibelchhe 717 a ni ta tih a sawi.
A tira an inruahman aia tam sum hmuh tur an neih chunga sorkar kum ral hmaa an sum hmuh tur bituk an hmu thei chu thawktute inpekna vang a nih thu a sawi a, “Kan officer-te an thawkrim hle a, GST return file lote an zawng chhuak a, return file turte an pui bawk a. District capital-a kan officer-ten khaw tin fangin hma an la,” a ti.
Taxation department-a thawktute hmalakna ngawt a tawk lo tiin, sumdawngte chu an pawimawh a, chhiah pek ngaih pawimawh nachang an hriat tak avanga chhiah pawh hmu tha zel an nih thu leh department thenkhata officer contract pe thinten GST deduction tih turah an thawhpui that tak vang a nih thu a sawi.
Kailiana Ralte chuan kuhvaa sumdawngten chhiah pe ve mah se chhiah an hmuh that chhan a ni lo tih a sawi a, “Champhaia kuhva tax pek hi chu kuhvaa sumdawngten eng emaw an duh avangin an rawn pe a ni mai a, kan collection-ah eng emaw zat lut mah se thla khatah a tam tumin Rs nuai 20-30 inkar a lut mai thei a, kan collection-ah awmzia a nei lo,” a ti.
Taxation department-in chhiah an hmuh Rs 7,33,18,07,869.65 atanga State Goods & Services Tax (GST) atanga an hmuh chu Rs 1,31,00,00,000 a ni a, GST atanga hmuh a tam ber a a ni.