auto corner
by Ruata
SUV leh MPV thar kan hmuh har tawh loh tur te
India-ah tunhnaiah SUV kan uar thar em em a. Market lama hralh kal leh lirthei lei turte pawhin rilrua an ngaihtuah lian tak pakhat chu compact leh midsized SUV huang lirthei hi a ni awm e.
Hei bakah hian lirthei chuan nuam leh mihring phur tam thei MPV lirthei ho te pawh hian India ram a al tha viau a, mi pawimawh phurh nan leh khualzin phurh nana hman tam em em Toyota Innova Crysta tam zia te pawh hian MPV lirthei huang India rama a ‘hit’ zia a tilang awm e. Tun tumah hian heng lirthei huangtea lirthei thar kan hmuh tur leh, lirthei chhuak tawh, a chi thar tih chhuah leh tur te pawh a ni ang. Chutiang lam hawi lirthei thenkhat chu kan tarlang ang..
Kia Carens
Kia lirthei hi India ramah an hmingthang chho mek a. Kan state-ah ngei pawh hian an SUV chhuak mek pahnih Sonet leh Seltos kan hmuh nual tawh danah hian rampum huap ang pawhin a hmingthan tawh zia leh leitu an tam tawh zia a lang thei ang chu. Korea company lar Kia hian tunthla ni 15 bawr velah hian he an MPV thar tur Carens hi tihchhuah an tum a. Hei hi seat 6 leh seat 7 nei tein a chhuak dawn a, MPV dang – Maruti Suzuki Ertiga, Maruti Suzuki XL6, Toyota Innova Crysta, Mahindra Marazzo leh adangte a rawn el thei dawn.
He lirthei hi trim level panga – Premium, Prestige, Prestige Plus, Luxury leh Luxury Plus tein a rawn chhuak dawn a. Khawl chi thum – 1.5 litre naturall aspirated khawl, 1.5 litre turbo diesel khawl leh 1.4 litre turbocharged petrol te a lochhuak dawn a ni. Hei hi Kia Seltos leh Hyundai Creta ten an neih ang chiah a ni.
Ertiga & XL6 facelifts
Maruti Ertiga hi rei tak a lo chhuak ve tawh a. India company hlun Maruti in MPV an siamchhuah tha tak mai a ni a. A hnuah he MPV tihchangkan deuh hi NEXA kaltlangin XL6 tih hmingpuin a lo chhuak leh bawk a. Heng lirthei pahnihte hi hun eng emaw chen chu market lamah kan lo hmu tawh a. Maruti chuan tuaithar a tul tawhin a hria a ni ang e, hmel thar duhawm tak nen kan hmu thuai dawn niin a lang.
A khawl chu a danglam hmel vak lo a. Hetihrual hian design thenkhat an ti danglam ang a, 7 seater te pawh kan hmuh tawh hmel bawk a ni. Hei bakah hian a chhunglamah thil danglam thar tha tak tak a awm hmel a. Heng zingah hian touchscreen infotainment system thar tha tak a tel dawn bawk a ni. A chhuah hun tur hi puanzar a la ni lo na a kumin kum chance hmaa lirthei thar pahnihte hi an tihchhuah hman beisei a ni.
New Generation
Mahindra Scorpio
Mahindra Scorpio hi chu tupawhin an hria ang tih theih tur lirthei lar leh a chhuahna pawh rei tawh a ni a. Rei tak ata pawh Scorpio hi a chhuan thar model a lo chhuak dawn tih hi India ramah thuthang a awm tawh a. A dik chho zel bawk a, company lam pawhin an zep tawh hran lo. He SUV thar tur hi a hmelhmangah Scorpio chhuak mek nena khaikhin chuan a danglam hlak dawn a, a seat pawh 7 seater te thlenga a awm beisei a ni.
He lirtheiah hian Scorpio-a la awm ngai lo petrol khawl te pawh a awm tawh hmel a. A khawl hman turte hi pahnih – 2.0 litre turbocharged petrol leh 2.2 litre turbocharged diesel te a nih hmel bawk. A man to hoah 4 wheel drive system a awm tel hmel bawk. Hei pawh hi a chhuah hun tur la puang chiang lo mahse kumin kum tawp lam a nih beiseina a lian tawh hle.
Jeep Meridian
American lirthei company chuan India ramah an SUV tlawm lamah Compass an rawn hlawhtlinpui a. An SUV tha dang ho pawh a man a to viau e ti lo chuan tam tak an hralh tawh tho a. Jeep Compass hi chu kan state-ah pawh kan hmu nual ta a. A SUV tha leh man to turu tak Jeep Wrangler Rubicon te thlengin Mizoramah kan hmu.
He Jeep Meridian thung hi chu Compass chhuak mek platform nghahchhana duan a ni a. Jeep Commander tih hming puin Brazil-ah chuan tihchhuah tawh a ni nghe nghe. Tuna chhuak mek Compass aia lian hret tur a ni dawn a, 2.0 litre 4-cylinder turbocharged diesel khawl, 48V mild hybrid system nei tel a hmang hmel a ni. He khawl hian 200bhp power vel a pechhuak thei dawn a, 9 speed automatic gearbox, AWD system ni bawk a hmang dawn bawk.
5-Door Force Gurkha
Force Gurkha hi offroad SUV tha tak mai, kawng chhe ngam em em mai a ni a. Mizoramah chuan kan la nei tam lutuk lo a ang. Force Motors hian tunhnaiah a chhuak thar mawi leh changkang tak an tichhuak a, hei hi tunah Mahindra Thar te nen a inel mek a ni. Mahindra thar ang bawkin 3 door a ni a, lifestyle uanga mi an ni a. Hi range leh Low range four wheel drive system tha tak awm tel a ni a, hei bakah hian a hnung leh hma manual differential lock a nei tel bawk a, kawng chhengchhia a bik takin Himalaya tlang hnaih hmun hrang hranga zinkual nan an hmang nasa hle.Force chuan he SUV hi thutna awm tam thei deuh tur leh tangkai lehzuala a leituten an hman theih turin a aia sei deuh 5 door version tihchhuah an tum a. Tunah hian an enchhinlai thlalak leh video pawh a darh leh nasa tawh a ni. Hei hi Mahindra Thar-ah pawh kan hmuh tur tho niin a lang a, amaherawhchu Mahindra lam hian thawm an la nei lian lo a. Force lam hi an che chak zawk deuh a ni.
A khawl hman tur hi Gurkha chhuak mek te nen a inan tho beisei a ni a. A elpui tur pawh Mahindra Thar 5 door awm hun hunah a awm ve dawn chauh niin a lang a. Lirthei tha tak a ni dawn e.