Palai bial khawthlang lam tlawha zin mek Social Welfare Minister Dr. K. Beichhua chuan Siaha district Covid 19 Food Security Consultative chairman a nihna anga an hmalaknate tlawhin a enfiah.
Committee hian nikum leh kum hmasa lam khan Siaha district-ah leilet hactare 550 a thlawnin lei a lehsak a, an buh thar chhuah pawh thahnem takin a pun phah bawk a ni.
Nimina Phura khuaa committee hmalakna a enfiahnaah Dr. Beichhua chuan Phura khua chuan buh tin 4,000 atanga 5,000 velin an thar chhuah a pun thu a sawi a; Siasi, Chakhei, Zyhno, Lopu leh Chapi vela an buh thar pawh a pun phah hle tih a sawi bawk.
Dr K. Beichhua chuan committee-in ei leh barah intodelh nan lo neitute tanpuina kawngah chak taka hmalak chhunzawm zel an tum thu a sawi a. Phura leh a chhehvel khuaa leilette chu tangkai taka hman zel a nih tur thu leh an thar chhuahna tipung tura an mamawhte pawh ngaihtuah zel an tum thu a sawi.
Kum 2020-a Mizoramah Covid-19 a len tan tirh khan Dr. K. Beichhua hian ei leh barah Siaha district mipuiin harsatna an tawh loh nan tiin a kaihhruaina hnuaiah Siaha District Covid -19 Food Security Consultative Committee a din a, Vice Chairman-ah Palak bialtu MLA KT Rokhaw leh MADC a CEM N Zakhai te ruat an ni a, Siaha DC chu Member Secretary-ah ruat a ni bawk.
Social Welfare Minister Dr. Beichhua hian tun hnaia khawthlang lama New Saikao, New Laty, Laty leh Maisa khua a tlawhnaah Tipa CDPO leh official dangte hruaiin, Aganwadi Centre-a Nutrition supply an hmuh dante leh sem chhuah dante a enfiah tir nghal bawk.
Dr K Beichhua hian MADC General Election neih tur atana inbuatsaihna atana nimin khan Pala, Kiasie, Vahia, Khopai leh Zyhno khuate a tlawh chho nghal bawk a ni.