Nepalese sorkarin report an siam, BBC hnena a ruka thlengah China chuan an thenawm ram chhung hi an inrina bawrah a daisak tih tar lan a ni.
Tun tum hi Nepal-in an ram chhunga Chinese an luh a sawi vawi khatna a ni.
Report hi nikum September-a siam kha niin China hi Nepal khawthlang lam kil, Humla district-ah an lut nia tar lan a ni.
Kathmandu Chinaese embassy chuan he thil hi phain an ram chu an ram thenawma an luh loh thu an sawi.
Nepalese sorkar hian BBC-in an zawh chianna chu a la chhang lo.
Engvangin nge report hi tihchhuah a nih loh tih hriat a ni lo va; mahse, Nepalese sorkar hian tun hnaiah China nena an inkungkaihna hi nasa taka titharin India leh an thenawm ram pakhat zawk inhuatna karah hian China chuan Nepal hi a kawmngeih nia ngaih a ni.
Nepal leh China ram hi km 1,400 dawn Himalayan tlangdungah an inri a. Kum 1960 chhova inremna eng emaw zat an ziah hmanga inrina siam fel an ni.
An inrina hmun tam zawk hi kilkhawr tak tak leh thlen harsa tak tak a ni hlawm a. Lungphun (pillar) siam a ni a; mahse, kilometre inkar hlat tak taka phun a ni a. Ramri hi khawiah chiah nge a kal tih pawh hriat harsa tak a ni fo thin.
Nepalese sorkar hian Chinese-ten an ram chhung an dai tih an hriat hian Humla-ah taskforce an thawn a. Sawi dan thenkhatah chuan China hian Nepalese lam chinah in pawh a sa nual a ni.
Taskforce team-ah hian police leh sorkar aiawh an tel.
BBC-in report a dawnah chuan team hian Chinese venhim hna thawktute chuan Nepalese ram chin, Lalungjong an tihah pawh sakhaw thiltih pawh an khap niin an sawi.
Heng lai hmun hi tun hma atang tawha sakhaw thila zin tamna niin Mount Kailash an tlawh thin a, he tlang hi China ramri bul chiaha awm niin Hindu leh Buddhist sakhaw hmun a ni.
Report-ah hian China chuan Nepalese lo neituten huan thlai an neih chin pawh an khapsak nia tar lan a ni.
Heng lai hmunah tho hian China hian ramri lungphun (border pillar) chu palin an hung hnan a, Nepal ram chinah tuikawng leh kawngpui siam pawh an tum bawk.