Manchester United chu Premier League top four a\angin an tla chhuak a. Thawhlehni zanah league match 50 chhunga goal khung tawh lo Jay Rodriguez goal an khung tir avangin 1-1 in Burnley nen an inhnehtawk.
Turf Moor a Premier League inkhelah tunhnaiah Manchester United zia dik tak a lang leh a. Hun tam zawk chhung inkhel thununtu ah \angin an chance neih \hatte an khung hleithei lova. An goal venghim zo lo bawkin point an hloh.
United ngai bawk
United in first half-ah goal thum an khung a, mahse minute 18-na a Paul Pogba goal khung chauh pawm a ni.
France midfielder hian hun engemaw chen inhliam avanga a chawlh hnuah a vawi hnihna atan inkhel bul a \an a. Kum 2021 January hnua a league goal hmasa ber a khung.
Hemi hma hian United in Raphael Varane hmanga goal an khung chu Harry Maguire a lo offside nia ngaiin video assistant referee chuan goal-ah a pawm lo.
Jadon Sancho thawhrah a\anga Marcus Rashford-a’n ball a cross chu Josh Brownhill chuan an lamah a tilut palh bawk a. Mahse goal luh hma a Paul Pogba a foul nia a lan avangin goal pawm loh a ni nawn leh.
Heng bakah hian first half-ah Burnley an khelhchhiat em avangin United in chance an nei \ha a. Burnley goalkeeper Nick Pope chuan Marcus Rashford, Edinson Cavani leh Raphael Varane te goal khung tur a dansak vek.
Second half-ah Middlesbrough an hmachhawn \um ang bawkin United hi an khingpuiten goal hma a an felfai loh an tawrh tir a. Inkhel \an leh veleh United tlarhnung an buai.
Striker thar Wout Weghorst chuan ball fing tak Jay Rodriguez hnenah a pe a, ani hian khawvela defender manto ber Harry Maguire chu defender naran takah a chhuah a, professional football a league goal 100 a khungna turin an si phurh a sut.
Team pahnih an intluk hnuah United in ball chang tam mahse si phurh sut an hnaih tawh lova. Second half-ah goal chance mumal an nei lo.
An result avang hian panganaah an tla thla a, an hnuai a awm team pathumte anni aia khel tlem an nih avangin pelh theihna hun an nei vek.
Lehlamah Burnley hian dinhmun him chu point 4 in an hlat mek a. Nimahsela match thum tlawm tawh lo an ni a, match 10 chhung chak hmel hmu tawh lo nimahsela an point hmuh hi an tan point khat hlu tak a la ni thei.
Inkhel zawh lam
Manchester United interim manager Ralf Rangnick chuan, “Goal thum kan khung a, Zirtawpni kan inkhel ai chuan a danglam deuh. Kan goal hnihna kha, foul tia a phar ber thlen hnu second 10 vel a kal lehin a phar chauh a. Foul a tih pawh kha a nem hle in ka hria.”
“First half-ah kan khel\ha leh hle a, kan thunun \ha hle. Second half-ah kan huaisen tawk lova, anni lam khan min rawn nawr an tum dawn tih kha a chiang a, khalai kan inven dan kha, a \ha tawk lo tih a chiang hle.” tiin an inkhel chungchang a sawi.
Burnley boss Sean Dyche chuan an dinhmun hautak chu sawifiahin, “A awlsam lo, Arsenal-ah kan him hram a, Watford-ah kan chak teuh a, tunah United lakah chance \ha kan neih hmang \angkai in point kan hmu. Point hlohte ui a duham viau hman kan ni lova, mahse kan point hmuh leh kan result neihte a\ang hian hmalam kan pan thei. Kan tum ram hi kan thleng thei tih rinna hi kan nei tlat.” a ti ve bawk.
Magpies beiseina a nung
Newcastle United chuan relegation zone an chhuahsan a, anni ang bawk a tlak hlau a bei ve mek Everton lakah hnehna changin tun season a inham tang tura an beihna an kalpui zel.
St. James’ Park-ah Everton in manager thar Frank Lampard-a hovin a vawikhatna atan inkhel an hmachhawn a. Mahse Eddie Howe-a pawlte hi team \ha zawkah \angin tun season a vawikhatna atan a zawnin hnehna an chang a, inhamtang turin beiseina an nei tih nemnghet turin 3-1 in an chak.
Minute 36-naah Magpies hi si phur hmasa zawkah \angin Jamaal Lascelles own goal Everton in an nei a. Hei hi second 108 hnuah Newcastle in chhangletin Mason Holgate chuan an lamah a ti lut ve zui.
Newcastle zawk hi chance siam tam zawkah an \ang chhunzawm a. Second half ah Ryan Fraser-a’n an goal hnihna a khung hnuah lakluh thar Kieran Trippier chuan freekick a\angin an goal thumna a khung.
Newcastle manager Eddie Howe chuan, “He hnehna hian a \ha zawnga kan team boruak leh kan rilru a kaihhruai dan tur hmuh theih ka beisei. Inrintawkna lian tak kan nei chho zel a, kan team pumpui pawh kan phur.”
“Inkhel intluk takah danglamna siam tura kan thiltih ngaite kan tihna kawngah hma kan sawn bawk.” tiin a sawi.
Hammers an chak
West Ham United chuan top four a hmun luah leh turin hnehna an chang a. Watford 1-0 in an hneh.
London Stadium-ah Hammers tan Jarrod Bowen chuan minute 68-naah goal a khung a. He result avang hian Hornets hi league-ah match 10 chhung chak nei lovin an kal tawh.