Allahabad High Court chuan Ningani khan Uttar Pradesh-a Lakhimpur Kheri tharum thawhna thlenga mawhphurtu bera puh, Union Minister of State (Home) Ajay Mishra ‘Teni’ fapa, Ashish Mishra chu bail-in a chhuah.
Uttar Pradesh assembly inthlana vote thlak thawh khatna neih a nih mek laiin chhuah a ni a. State hawthlang lam, lo neitute tamna lai bawrah Ningani khan inthlan thawh khatna hi neih a ni.
Ashish-a hi October 9, 2021 khan Lakhimpur Kheri-a thil thleng avangin man a ni a. Lo neituten lo neihna kaihhnawih dan (farm law) duh lohna an lantirnaa lo neitu pali leh chanchinbumi thihna thleng avanga man a ni.
He thil thleng chhuitu, Special Investigation Team (SIT) chuan October 3-a an chhuina an thehluhah Ashish Mishra-a hi thil thlenga mawhphurtu berah an puh a ni.
Lakhimpur Kheri-ah hian lo neitute kawng zawh chu lirthei inzui zinga pakhatin an hnung lam atangin a su nia sawi a ni a, lirthei zinga pakhat hi union minister ta hi a ni.
Lo neitute hian Deputy Chief Minister Keshav Prasad Maurya-a’n Teni-a chawr chhuahna khua a tlawh dawn laiin farm law duh lohna lantirin kawng hi an lo zawh a. Teni-a hi tunah hian Kheri bialtu BJP MP a ni mek a ni.
Eptu party-te chuan Teni-a hi union ministry-a a chanvo chelh atangin bâng turin nasa takin an nawr zui bawk.
Lakhimpur Kheri-ah hian hruaitu hriat hlawh tak a ni a, kum 2012-ah Nighasan bial atangin MLA-ah thlan tlin niin kum 2014 leh 2019 khan MP atan thlan zui a ni a, MP a nih vawi hnihnaah union minister a ni ta hial a ni.
A bial hian Palia, Nighasan, Lakhimpur, Srinagar leh Gola Gokarna Nath assembly bialte a huam a. Kum 2017 assembly inthlanah khan heng bial zawng zawng hi BJP-in an la vek a ni.
Tun tuma assembly inthlan kal mekah erawh a campaign lo hle a, BJP chuan tun hnaia thil thleng thlirin hman vak a rem rih lovah an ngai niin PTI chuan a tar lang.