Pakistan-a rinna lama mi tidam thei nia sawi, nu nau pai lai lua perek kilhtu nia hriat bawk chu zawn mek a ni.
Hmeichhia hi plyer hmanga a lua perek inches hniha sei lut lak chhuah tuma a beih hnuah Peshawar-a damdawi in a pan a ni.
A tirah chuan doctor-te hnenah hian ama tih niin a sawi a; mahse, a hnuah rinna lama kal fawr pakhatin a nau pai chu mipaa a pian ngeina turin hetiang hian a tihsak niin a sawi.
Police chuan online-a x-ray thlalak a darh hnuah an chhui zui mek.
Lady Reading Hospital-a thawk, Dr Haider Khan chuan hmeichhia hi damdawi in a thlen lai hian ‘thil a hre vek a; mahse, na a ti hle’ niin a sawi.
Damdawi ina thawkte chuan an thenawmten an ti tih thawm a hriat angin rinna lama kal fawr hi a dawr ve ta niin Dawn chanchinbu an hrilh.
Hmeichhia hian fanu pathum a nei tawh a, a pasal chuan hmeichhia bawk a hrin leh chuan hnawhchhuahah a vau niin an sawi bawk.
“Thla thum mi a pai mek a, a pasal a hlauh em avangin hetiang hian a ti ta a ni,” tiin thawktute chuan an sawi.
Asia chhim lam ram rethei thenkhatah hian fapa hi nakin zela chhungkaw chawmtu turin fanu aiin an duh zawk a, mipa an neih theih nana rin dan mak tak taka kal leh che an awm fo thin.
‘Faith healer’ tia an sawi mai, hetianga mi an rawn thin hi Pakistan hmun thenkhat, a bikin hmarthlang lama tribal chen tamnaah an la awm a. An tih dan hi Sufi lore an tih nena inzul, Islamic sakhaw thil nena inkaihhnawih a ni.
An chen dan hi Islam sakhaw peng tam tak chuan an khap thung.
Thawhlehni khan Peshawar police chief Abbas Ahsan chuan chhuitu tur team an an din thu leh nu nau pai lai nunna derthawng taka siama mipa a neih theih nana thutiam lem siamtu chu an zawn mek thu a sawi.
Police hian damdawi ina thawkte an kawl hmasa a, damlo ber hi perek an lak chhuahsak hnuah a haw leh tawh a. Hmeichhia hi an umzui a, ani hian a titu chu a hrilh theih ngei beisei a ni.
“A titu ber hi kan zawng chhuak thuai ang,” tiin Ahsan chuan a sawi.
Ahsan-a hian hmeichhiain damdawi in a thlen ruala thawktuten an hnena an hrilh mai loh chhan pawh officer-te hian an chhui dawn tih a sawi bawk.