Russia-in Ukraine a rûn mai hlauhthawn a nih mek laiin Russia leh Belarus ramte chuan ni 10 chhung awh tur sipai nunchan zir (joint military drill) an tan.
Belarus hi Russia nena inkawmngeih tak niin Ukraine nen thui tak an inri bawk.
France chuan drill an neih dun hi Russia-in Cold War hnu lama Belarus-a sipai a chhawp hnem ber tum nia a ngaih thu sawiin ‘tharum thawhna thlen theihna lam hawi’ niin a sawi a. Ukraine pawhin ‘rilru lama innawrna’ niin a sawi bawk.
UK Prime Minister Boris Johnson chuan Ningani khan Europe khawmualpui chuan kum tak hnua venhimna lama hun khirh lai ber a tawng mek niin a sawi.
Russia erawh chuan ramri-ah sipai 1,00,000 chuang dah mah se Ukraine rûn tumna a nei lo tih a sawi nawn leh tawh a. Hetih lai hian United States leh khawthlang ram dangte chuan inrûnna hi thleng thut thei reng a ni tih an sawi thung.
Russia leh Belarus ram sipaiten nunchan an zir hi Allied Resolve 2022 tia vuahin Belarus leh Ukraine inrina bul lawk, km 1,000 chuang awrh chauhva an neih a ni.
Russia hian Ukraine hi a rûn a nih chuan tuna nunchan an zirna atang hian an sipaite chuan Ukrainian khawpui, Kyiv chu an hnaih lehzual thei dawn a, awlsam takin an bei mai thei dawn a ni.
Belarus hruaitu, Alexander Lukashenko chuan Russian President Vladimir Putin nena an inkawmngeihna a ngheh thu leh ram pahnihte hi ‘Union State’ (ram pakhat) ang nia sawiin hei hian ei bar zawnna leh sipai lama an inpuihna pawh a huam thu a sawi a. Kremlin hian Lukashenko-a hi kum 2020-a inthlana dik lo takin a tling nia sawi a awma Belarus-a amah duh lohna nasa taka lantir a nih lai khan a lo thlawp tlat tawh a ni.
US chuan nunchan zirnaah hian Russian sipai 30,000 zet an tel a rinawm thu a sawi a, Moscow leh Minsk erawh chuan an sipai tel tur zat an sawi chiang lo ve ve.
Russian defence ministry chuan tun tuma an thenawm ram sipaite nena nunchan an zirin a tum ber chu ‘pawn lam atanga beihna lo dan kir leh invenhimna lama beihpui thlak dan zir’ a nih thu a sawi a. Sipaite hian ramri venhim dan zirin ralthuam leh hmanraw dang inpekchhawn dan dan pawh an zirho bawk ang.
Russia chuan an sipaite hi an ram chhunga duh duhna an kaltir chu an zalenna a nih thu leh an thawhpui ramten an phal bawk chuan an rama luhtir pawh a theih niin a sawi a. Belarus chuan Russian sipaite hi nunchan an zir zawhah chuan an awmna hmun pangngaia an let leh mai tur thu a sawi bawk.
Kremlin thupuangtu chuan nunchan zirho hi a pawimawh tak zet tih sawiin Russia leh Belarus chuan ‘rin loh tak tak atangin beih leh vau a tawk thin’ niin a sawi.
Russia hian Ukraine chhim lam, Black Sea leh Sea of Azov-ah naval exercise a nei mek bawk a. Kyiv chuan hetianga an chetna hi a dik lova, khawvel lawng kalhmang tur a ni lo tih a sawi.