India sorkar chuan Chinese application 54 zet chu India himna tiderthawng thei nia ngaiin khap (ban)-na thupek chhuah a tum.
Union electronics & information technology ministry chuan home ministry atangin app 54-te hi IT Act-a Section 69(A) hmanga khap tura ngenna a dawng tih a sawi.
App khaop tum zingah hian Beauty Camera: Sweet Selfie HD, Beauty Camera – Selfie Camera, Equalizer & Bass Booster, CamCard for SalesForce Ent, Isoland 2: Ashes of Time Lite, Viva Video Editor, Tencent Xriver, Onmyoji Chess, Onmyoji Arena, AppLock leh Dual Space Lite te pawh a tel.
MHA hian heng app-te hi a ang siam (cloned version) emaw pawh ni sela, kum 2020-a sorkarin a lo khap tawh app 267-te ang bawk khan mi mal thil leh himna lam thil tiderthawng thei a ni tih a sawi niin IT ministry chuan a sawi.
Sorkar laipui hian June 29, 2020 khan app 59 chu India-a hman a lo khap tawh a. A hnu lawk, August 20-ah app dang 47 chu a khap leh a. Hei hi la duhtawk lovin September 1-ah app 118 leh November 19-ah app 43 a khap zui leh bawk.
Ministry chuan tuna khap leh tum app 54-te hian a hmangtute nihna hrang hrang a la khawm thei niin a sawi a. “Heng an thil lak khawmte hi dik lo taka hmangin a hmangtute awmna rama server-ah a sawn let thei a. Hei hi a hmangtu nihna dik tak siam, dah leh zirna tur a tibuai thei dawn a. Chu chuan India himna leh chet velna pawh a nghawng thei dawn a ni,” tiin IT ministry thuchhuah chuan a tar lang.
“Heng bakah hian thil pawi thei tak a ti thei a. Ram enthlakna atana hman thei niin camera/mic bakah a hmangtu awmna hriat theihna a awm a ni,” a ti bawk.
App khap hmasakte pawh hi hetiang behchhan bawk hian, ramria China nena innghirnghona boruak a san laiin India hian a khap a ni.