David Zohmangaiha, Councillor, Ward No XVII chuan a ward chhung, Upper Republic a hmeithai in sak that nan a ward fund atangin Rs. 1,00,000 a hlan.
Dohliri (L) in hi Assam type niin a hlui tawhin a tluk a hlauhawm a, DC atangin thiat turin tih a ni tawh nghe nghe.
In sak thar nan hian sum leh pai an neih loh avangin Upper Republic khawtlang chuan local council hmalaknain sak thatsak turin hma an la a, hemi atan hian councillor hian tanpuina hi a pe a ni.
In sak tanpuina tur pawisa inhlanna hun hi R.Vanlawma (L) in, Upper Republic-ah local council kaihhruaiin hman a ni a. David Zohmangaiha chuan thuthmun atanga sawisel tawp mi an tam em laia mi harsa tanpui nana khawtlang hruaituten ngaihtuahna an seng chu a lawmawm a tih thu a sawi a. Mi dang tanpui kawngah pawh mi kawhhmuhtu nih zel tum turin kalkhawmte a chah bawk.