Directorate of Forensic Science Laboratory-a bun thar Cyber Forensic Laboratory chu Home Minister Pu Lalchamliana’n nimin khan a hawng a, mahni nihna thupa Social Media-a midang ti hmingchhe thinte man chhuah theih nan hman ni thei se a duh thu a sawi.
Lalchamliana chuan, Cyber Forensic Laboratory hawn a ni chu lawmawm a tih thu sawiin, tunahnaiah Fake Account siama mi dang puh hmingchhiatna te a tam thu sawi a,”Chutiang ti thinte chu Laboratory hian a chhui theih turah ngai ila, chutiang tur chuan tran la se ka duh hle a ni,” a ti.
Home minister chuan, tunhnaiah Cyber Crime kaihhnawih pawikhawihna Mizoramah a hluar nia hmuh a nih thu sawiin, kum 2020 hnua lamah ringawt pawh Police station an case 700 chuang ziah luh a nih thu a sawi.
Cyber Forensic Laboratory hi sorkar Laipuiin hmeichhiate an him zawkna tura a hmalakna lian tak Nirbhaya Fund Scheme hmanga din a ni a, India rama state 10 Pilot Project atana a thlan zinga Mizoram FSL pawh telin Nirbhaya Fund atanga cheng nuai 415 an dawng a. He fund hi cyber forensic laboratory din na atan leh DNA division tihchangtlun nan hman a ni.
Laboratory ah hian mobile phone leh computer atanga data lakchhuah a enfiah te, data nawhreh tawh leh hard disk chhia atang pawha evidence pawimawh tak tak lak let te, cryptocurrency hmanga pawisa inthawn dan chhuite, pawikhawihna hmunah eng cell tower te nge awm tih hriat theih te bakah email chhui te an ti thei dawn a ni.
He hunah hian FSL Director H. Sangchungnunga’n FSL chanchin an hnathawh dan a sawi a, DGP Devesh Chandra Shrivastava leh a thawpui IGP te, Home Department officer te leh District & Sessions Judge te an tel a ni.