Alexander the Great kha a thianpain pawisa talen 10 a dil a. Ani chuan talen 50 a lo pe mai a; a thianpa chuan talen 10 hi ka mamawh tawk a ni e, a tih pawhin ani chuan, “Ï tan chuan talen 10 hi a tawk a ni thei e, i hnena ka pek tur che atan chuan a tawk ka ti ve lo alawm,” tiin a duh aia tam a dawn tir tlat.
Tum khat chu Queen Elizabeth-I kha hmeichhe pakhatin thah a tum a. Lal in chhung lama an thiltih dan hre hauh lovin mipa inthuamin a lut a, lalnu pindan chhunga thawmhnaw khai zingah chuan chemte zum pai chungin a biru kak mai a. Lalnu lo luh hmâin vengtu pakhatin pindan a rawn enfel a, a rek chhuak nawlh mai a.
Mihring rilru pangai atang chuan a dinhmun a duhawm lo tih chu a chiang kher mai. Lalnu hmâah an hruai a, chu nu chuan khawngaihna dil bak tih theih a nei lo tih a hre chiang; thing thiin lalnu hnen-ah chuan hmeichhia a nih avanga lainatna leh khaw-ngaihna lantir turin a ngen a.
Queen Elizabeth chuan ngawi rengin a en vang vang a, “I chungah khawngaihna lantir ta i la, i nun zel dan tur atan eng thutiam nge i neih dawn min hrilh rawh,” a ti a. Hmeichhia chuan lalnu chu a en a, “Tiamkam leh thu delhkilh awma khawngaihna chu khawngaihna a ni thei lo reng reng a lawm!” a ti tlat mai a. Queen Elizabeth chuan, “I tidik lutuk. Ka khawngaihna avang chauhin ka ngaidam a che,” a ti a.
A phu hauh lo chungin a chhuahtir a, mi zalen pangai angin lal in atang chuan a chhuak leh ta a ni.