Lunglei Municipal Council (LMC) din tura hmalakna kal mekte leh hmachhawp hrang hrangte zirhona chu nimin khan neih a ni a, LMC chu sorkar kum thar atangin bul tan theih beisei a ni tih tar lan a ni.
He huna an tar lan danin LMC chu 2021-22 atana bul tan nan budget allocation Rs nuai 80 dawn a ni a, LMC atan hian CEO, Secretary, Superintendent, Finance & Accounts Officer leh Assistant post-te create-na notification chu January 24-ah tihchhuah a ni. LMC Office dinna tur pawh sorkar atangin approval hmuh tawh niin, Convention Centre-a bultan tum a ni.
LMC area tihchianna tura delimitation of ward-te, Lunglei khawpuia village council awm lai local council-a thlak dan turte sorkarah rawtna thlen a ni tawh bawk.
Finance department-ah LMC tana 10% ULB Grant hmanna tur Expenditure sanction proposal thehluh tawh niin, sorkar kumthar atang hian bul tan theih beisei a ni.
He huna zirtirna petu, UD&PA Director H Lianzela chuan thu sawiin, Lunglei khawpui tihmasawn zel turin municipal body chak takin a enkawl a hun ve tawh a ni tih leh LMC din a nih chuan thuneihna sem zaina a takin a awm ang a, mipuiin an aiawha an thlanten khawpui enkawlna kawngah mawhphurha leh thuneihna sang zawk an nei dawn tih a sawi.
H Lianzela chuan 15th Finance Commission hnuaiah kum tin ULB-ten inenkawlna leh hmasawnna hnathawh nan ULB Grant Rs vaibelchhe 35 chuang hmuh ziah beisei a nih thu sawiin, hemi atang hian Lunglei mipui awm zat chhutin kum tin Rs. nuai 570 chuang LMC hian chang thei tura beisei a ni tih leh LMC Election pawh a hma thei ang bera neih an duh thu a sawi bawk.
AMC Joint Municipal Commissioner H. Lalhmingthanga chuan Aizawl Municipal Corporation inrelbawl dan tlangpui leh hmalakna hrang hrang zirtirna pein, Property Tax, Licensing, Hoarding, parking, solid waste management, building permit-te AMC hnuaia kalpui dan te zirho a ni.
He hunah hian MJA, MUP, Sub Hqrs YMA, Chhimbial Chhantu aiawhte leh official te an tel a ni.