Vawiin tlaiah Mizo professional boxer-ten Dubai-ah inhnek an hmachhawn dawn a. ‘India vs Pakistan’ tia hminglem an vuah fight card-ah Mizo boxer pathum an inlan dawn.
Dubai a Golf Club-ah professional boxing inelna hi buatsaih a ni a. Promoter Phuc An Nguyen hnuaiah veteran Gullermo Rigobdeaux leh Vincent Astrolabio ten WBC international bantamweight title an inchuh dawn a. Heta under-card-ah hian Lalrinsanga Tlau, NT Lalbiakkima leh Laldingliana te an inlan dawn.
Under-card hi Phuc An Nguyen-a hnuaia People’s Fighters promotion leh Mizo boxer-te promoter Grassroot Boxing Promotions & Management te buatsaih a ni dawn a. Tlai dar 5:45-ah Mizo boxer te an inhnek \an ang.
WBC World Youth title kawltu Sangtea’n Superfeatherweight huangah Muhammad Sikandar Abbasi a hmachhawn dawn a a. A khingpui tur hi vawi 9 inlan a\ang vawi nga chak tawh a ni.
IBA intercontinental champion ni lai NT Lalbiakkima’n Fida Muhammad a hmachhawn dawn a. Professional huangah vawi li a inhnekna a ni ang.
Vawi hnih inhnek a\anga la chak ve ve Laldingliana chuan Muhammad Ammar Khan a hmachhawn ve dawn bawk.
Amateur level a Mizo boxer \ha tak HC Johnkenty Vanhlimpuia chu inlan tura tihfel a ni vek a, nimahsela a hnathawhna Indian Navy a\ang phalna an pek loh avangin a inlan thei dawn lo thung.
Grassroot Promotions hotu Mujtaba Kamal chuan, “Johnkenty hi engkim tihfel ni tawh mahse international fight-ah sorkar phalna kan lak hmasak a ngai a, hei hian hun a duh deuh avangin kan tifel hman lo. Inelna kan buatsaih leh turah erawh a tel ngeina turin rang takin kan buaipui zui ang.” tiin The Zozam Times a hrilh.
Kamal chuan, “Mizo mipuiten boxing an hlutzia kan hmu a, tun \umah pawh Indian boxing a a sang ber pawl ni turin Mizo boxer-ten sum an hlawh dawn. Mizo boxer-te inhnek thlir hi a pawimawh. Sum \hahnem tak sengin promoter-ten inelna kan buatsaih a, sum hloh reng chuan buatsaih reng a har. Kan boxer-ten inlanna tur an neih zel theihna turin Mizo mipuite puihna kan dil.” tiin a sawi.
Inhnek hi pay-per-view hmanga en tur niin Zonet kaltlanga en duh tan mahni veng distributor te hnenah Rs. 100 pekin a en theih a, Zonet Empai application a\angin man chawiin a en theih bawk ang.