Syrian khawpui, Damascus-a shopping centre lian taka kangmei chhuakah mi 11 vel an thi tih an ram interior ministry chuan a sawi.
al-Hamra Street-a La Mirada Mall-a kangmei chhuak hi Thawhtanni zana mi niin zankhuain a kang tih sorkar enkawl news agency Sana chuan a tar lang.
Mi pahnih chhanchhuah an nih thu AFP news agency chuan interior ministry sawi a tar lang a. AFP hian sumdawnna hmun tam tak a tichhia tih a tar lang bawk.
Kangmei chhuah chhan hi chhui zui nghal mek a ni.
Kangthelhna khawl 20 hmanga thelh a ni a, darkar li chhungin thelh mih hman a ni a. Sana chuan ‘building pum’ hi a kan hma hian a êng pup niin a tar lang.
A hnuah erawh chhawng ruka sang in hi a thim vek a, meikhu chhah takin a khuh a. A bul kawngpui chu tukverh frame tla, kang nawi leh tuiin a tla darh nasa hle.
Civil defence director chuan thite zinga a tam ber hi vengtute leh thawktu dangte an ni tih a sawi niin AFP chuan a tar lang bawk.