Delhi-Gurgaon expressway-a awm, CNG pump pakhatah Thawhtanni tuk khan mi pathum zet vih hlum an ni a. Heng mite nen hian tun hnai ni thum chhungin Gurgaon-ah mi pathum thah an ni tawh.
Police chuan Sector 31 CNG pump-a CCTV camera-te chu pawi khawihna a thlen hma lawkah tihthih (deactivate) a ni a, pawisa bo engmah a awm lo niin an sawi a. A titute hian a hmunhma hi an hrechiang thawkhat hle niin an ngai a, rei tak lo inhmelma tawh kara intihbuaina a nih an ring bawk.
Police chuan Thawhtanni tuk zing dar 3:00 vel khan CNG pump bul chiaha petrol pump-ah mi pakhat chu chema vih niin thisen a chhuak nasa hle tih thu police chuan an dawng a. Police-in CNG pump an thlen chuan pindanah ruang pahnih an hmu zui a, bangah thisen a lo darh nasa hle bawk a. Ruangte hi vih nawn mawlh mawlh an ni tih a lang.
Gurgaon Police Commissioner Kala Ramachandran-a pawhin thil thlenna hmun hi a tlawh tawh a, a titu hi ngawrh takin an zawng mek a ni.
Thite hi petrol pump manager Pushpendra, operator Bhupendra Kumar leh filler Naresh Kumar te an ni.
Bhupendra Kumar-a unaupa chuan hma takah phone dawngin petrol pump an pan a, thiin a unaupa chu an hmu tih a sawi a. “Police-in engmah min hrilh lo va, engtiangin nge hetiang hi a thlen kan hre lo,” a ti.
Police officer Vijender Vij chuan, “Petrol pump neitu kan biaknaah pawisa bo a awm lo tih a sawi a, kil hrang hrang atangin kan chhui mek a ni,” a ti.
Hetiang thil a thlen hma ni lawk khan Gurgaon-a Pataudi subdivision-ah unau mipa pahnih chu chhun ên laiin kah hlum an lo ni tawh bawk.